Д.Болд

Дундговь  аймгийн Хулд сумын нутагт  байх  “Түймэртийн  цагаан” гэх жоншны  уурхайгаас тус аймгийн ИТХ-ын  дарга С.Буджав хууль  бусаар жонш  зөөж,  жоншийг тээвэрлүүлсэн жолооч нарт хөлсийг нь өгөлгүй бултсан тухай мэдээ zone.mn, zaluu.com цахим  хуудсуудад гарчээ. Өнгөрсөн зургадугаар сараас хойш С.Буджав дарга  аюулгүй байдал нь хангагдаагүйн  улмаас хаагдаад  байсан уурхайгаас 674 тонн  жоншийг Хэнтий  аймгийн Бор-Өндөр сум руу зөөлгөсөн тухай бичсэн  байна.  Улмаар нэр бүхий  жолооч  нарт  37,7  сая төгрөгийн  ажлын хөлсийг нь өгөлгүй бултсан гэжээ.  Энэ талаар Дундговь  аймгийн ИТХ-ын дарга  С.Буджаваас  өөрөөс нь  тодрууллаа. 

-Таныг  жонш зөөсөн хэрэгт  холбоотой гэсэн мэдээлэл  гарчээ. Энэ үнэн юм уу?

- Өнгөрсөн сарын  13-нд  Хулд  суманд  байх “Түймэртийн цагаан”-ны жоншны  ордоос  Хэнтий  рүү жонш  зөөсөн жолооч нарын тээврийн хөлстэй  холбоотой  албан бичиг  манай дээр  ирсэн юм.  Гэхдээ  энэ нь  надтай  огт  холбоогүй. Тэгэхээр наад мэдээлэл чинь худал  гэсэн үг. Надтай  холбоотой гэх буруу ойлголт,  мэдээлэл, хардлага гарсан юм шиг  байна лээ.

-Та өөртэйгөө  холбоогүй  гэдгийг хэрхэн батлаж байгаа юм бэ?

-Жонш  зөөсөн  жолооч  нар  өөрсдөө  надаас албан ёсоор уучлалт гуйсан. Тэд аймгийн ИТХ-ын дарга С.Буджавыг  бид өмнө нь огт  танихгүй, өр  авлага  байхгүй, бидний  зөөсөн  жонштой огт  холбоогүй  учраас  уучлалт  гуйж байна гэдгээ илэрхийлсэн. Буруу  мэдээлэл  гарсанд  харамсч  байна гэдгээ хэлж уучлалт гуйж албажуулсан байгаа. Энэ албажсан материалыг аймгийнхаа Цагдаагийн газраар шалгуулж баталгаажуулсан.