О.ОЮУН-ЭРДЭНЭ Орхон аймагт БНСУ-ын 100 хувийн хөрөнгө оруулалтаар 288 айлын орон сууцны барилгын ажил эхэллээ. Залуу гэр бүлд зориулсан уг орон сууцны хороолол нь 48-60 ам метр талбайтай нэгээс гурван өрөөтэй, хямд өртөгтэй байхаар тооцжээ. Орхон аймгийн нийт хүн амын 50-аас илүү хувь нь 18-35 насных тул залуучдад зориулсан орон сууц нэн шаардлагтай байгаа  юм.  Иймд аймгийн удирдлагууд өнгөрсөн онд БНСУ-ын Шихэн хоттой найрамдалт харилцаа тогтоож хамтын ажиллагааныхаа хүрээнд дээрх орон сууцны хороолол барихаар шийдвэрлэжээ. Барилгын гүйцэтгэгчээр “Рич констрокшн” компани ажиллаж байна. Тус компанийн ерөнхий захирал Д.Жавхлан “Төслийн хүрээнд нийт 288 айлын орон сууц барихаас  80 айлын орон сууцны хоёр барилгыг энэ оны арваннэгдүгээр сард орон нутагт хүлээлгэж өгнө” гэв.  Барилгын ажлын явцтай  аймгийн Засаг даргын орлогч А.Түвшинжаргал танилцах үеэрээ, "Төслийг хэрэгжүүлэхдээ Монгол Улсын хууль, тогтоомжийг ягштал биелүүлж, хяналт тавьж буй байгууллагууд ч хариуцлагатай ажиллах шаардлагатай. Чанар, өнгө үзэмж сайтай хороолол сүндэрлэх ёстой" хэмээн онцоллоо. Дээрх орон сууцны хороолол нь наадмын талбайн баруун талд хоёр га талбайд сүндэрлэнэ. Ингэхдээ  гадна зам, талбай, ногоон байгууламжийг иж бүрнээр тохижуулах ажээ. Дашрамд дурдахад, агаарын болон хөрсний бохирдлыг бууруулахын тулд орон сууцны хорооллын хүртээмжийг нэмэгдүүлэх шаардлагатай юм байна.