Ч.ГАНТУЛГА Багш нар цалингаа нэмэгдүүлэх тэмцэл өрнүүлээд есөн сар өнгөрсөн ч үр дүнд хүрсэнгүй. Энэ хугацаанд жагсаал зохион байгуулж, ажил хаялт зарласан ч төр засгийн зүгээс анхаарал хандуулсангүй гэж тэд үзжээ. Хэдийгээр гурван талт хэлэлцээрийн ширээний ард суусан ч амлалтаа биелүүлсэнгүй гэж Багшийн цалинг нэмэгдүүлэх түр хөдөлгөөн, Багшийн цалинг нэмэгдүүлэх түр хороо ТББ-ын тэргүүн Ц.Мөнхтуяа онцолсон юм. Тиймээс тэд энэ сарын 9-нд “Боловсролоо сэхээнээс аваръя, багшаа ядуурлаас гаргая” уриатай цуглаан зохион байгуулах болсноо мэдэгдсэн юм. Хохирогчдын холбооны тэргүүн Х.Оюунцэцэг “Боловсролын салбар гэдэг нийгмийн салбар юм. Энэ салбар доройтвол Монгол улс доройтно. Өнөөдөр сургууль гурван ээлжээр хичээллэж, нэг ангид 50 гаруй хүүхэд сурч байна. Тэднийг ирээдүйд зөв, мэдлэг боловсролтой болгох хариуцлага багш нарын гарт бий. Гэтэл бид багшаа үнэгүйдүүлж байна. Тиймээс манай холбоо энэ цуглаанд багш нарынхаа төлөө дуу хоолойгоо өргөх болно” гэв. Улсаа аврах ард түмний үндэсний хөдөлгөөний ерөнхий зохицуулагч Б.Жагар “Багш нарын цалинг нэмэгдүүлэх тухай дуу хоолойгоо өргөх ёстой үйлчвэрчний холбоо нь өөрөө эсрэг ажиллаж байна. Ийм байж болох уу. Гэтэл төрд суугаа түшээд нь мөнгөө гадаадад нуучихдаг” гэлээ. Эх сурвалж: www.polit.mn