Д.СҮРЭН

Чингэлтэй дүүргийн дөрөвдүгээр хороо, 30А байрныхан ойрноос түгшүүртэй амьдрах болжээ. Өмнө нь байр орчмынхоо зам талбайг шинэчлэн тохижуулж, хөгшид тухлах сүүдрэвч, хүүхэд залуучууд наадах тоглоомын болон биеийн тамирын бэсрэг талбайтай болж, 40 шахам гараашийг иргэд худалдан авчээ. Гэтэл хотын захирагч Э.Бат-Үүлийн захирамж тэндхийг бужигнуулж орхиж. 

Захирамжаар тус байрны эзэмшлийн зам, хүүхэд залуусын тоглоомын болон биеийн тамирын талбайг нурааж оронд нь Нийслэлийн Засаг даргын Тамгын газрын давхар гарааш, Чингэлтэйн Татварын газрын байр, ажилчдын 12 давхар орон сууц сүндэрлэх тухай дуулгав. 

2008 оны тавдугаар сарын 20-нд сууц эзэмшигчид нь СӨХ-оороо дамжуулан Нийслэлийн газрын албатай газар эзэмших гэрээ хийж 9683 ам метр талбайг өмч болгон баталгаажуулсан байж. Кадастрын зураг нь ч байдаг гэнэ. Гэрээнд СӨХ-ны эзэмшлийн энэ газарт тэдний зөвшөөрөлгүй барилга байгууламж барьсан болон бариулсан тохиолдолд “Газрын тухай хууль”-ийн 57-гийн 3, 4, 5 дугаар зүйлийн дагуу арга хэмжээ авна гэж бичсэнийг тоосонгүй. Оршин суугчид эдэлбэр газрынхаа 80-аад хувийг албаныханд алдахад хүрчээ. Хотын мээрийн өнгөрсөн зургадугаар сарын 17-нд гаргасан А/607 тоот захирамж олон төрлийн хууль зөрчсөн гэж оршин суугчид хэллээ. Нийслэлийн ИТХ-ын 2012 оны 3/10 дугаарт “Хот байгуулалтын хууль”-ийн 24 зүгээр зүйлийн 24.2 дахь заалтын дагуу 2030 он хүртэлх хугацаанд нийслэлийн нутаг дэвсгэрт шинээр газар эзэмшүүлэх, ашиглах эрх олгохгүй байхыг заажээ.

Наад зах нь “Барилгын тухай хууль”-ийн 10 гаруй заалт, Нийслэлийн Засаг дарга А.664 дугаар захирамжийн ЗТБХБ-ын сайдын 418 дуаар тушаалын 2.2 мөн тус сайдын барилгын норм ба дүрэм, авто зогсоолтой холбогдсон тушаал зэргийг шийдвэр гэж үзсэнгүй. Барилгыг орон сууцнаас 45 метр зайтай барих ёстой байдаг ч тэд объектоо 15-17 орчим метрийн зайтай барих гэж байна.

Дипломат ажилтны байрны зүүн хойно өмхий устай хар нүх бий. Нэг компани олон жилийн өмнө энэ газрыг ухаж дулаармагц хөрснөөс ус оргилоод байхаар нь орхиод явсан аж. Ийм газар 12 давхар барилга барих болжээ.

Нийслэлийн мэргэлжлийн хяналтын газраас энэ асуудлыг шалгаад олон хууль, журмыг зөрчсөн шийдвэр гэдгийг тогтоожээ.

Албаны хүмүүс энэ асуудалд хэрхэн хандаж байгааг сонирхож үзвэл, Нийслэлийн мэргэжлийн хяналтын газрын дэд дарга М.Баасандорж дээрх актыг Ерөнхий төлөвлөгөөний газарт явуулж илэрсэн дутагдлыг арилгах арга хэмжээ авахыг анхааруулсан боловч таг чиг болсон гэнэ.  Нийслэлийн өмчийн харилцааны газрын дарга Ш.Төмөрбаатар “Нийслэлийн Засаг даргын захирамжийг хүчингүй болгох үндэслэлгүй байна” гэсэн хариулт өгчээ.

Аргаа барсан оршин суугчид тэмцэхээр түр хороо байгуулан дүүргийнхээ Засаг дарга, Тамгын газар, хууль хяналтын байгууллагад өргөдөл өгсөн ч хариултаа аваагүй байна.