Х.ОЮУНБОЛД Өмнөд болон Хойд Солонгосын тэргүүн нарын түүхэн уулзалт болж байна. Энэ үеэр Өмнөд Солонгосын ерөнхийлөгч  Мүн Жэ Ин  Хойд Солонгосын удирдагч Ким Жон Унд  хоёр орныг холбосон төмөр зам тавих хүсэлтэй байгаагаа илэрхийлжээ. Тэрээр “Энэ нь  Сөүл болон Пхеньяны эдийн засгийн хамтын ажиллагаанд хувь нэмрээ оруулах алхам болно” гэв. Тэд өмнө нь энэ асуудлаар хэлэлцэж байсан ч хэрэгжиж байгаагүй М. Мөн хоёр Солонгосыг холбосон төмөр замтай болсныхоо дараа ОХУ-ын Транссибирь төмөр замтай холбох төлөвлөж байгаа аж. Ингэснээр Солонгосын хойг  болон Европ тивийн хооронд хийх худалдааны асуудлыг хөнгөвчилж өгөх юм байна.   Мөргөлдөөнийг зогсооно   Мөн энэ үеэр Хойд Солонгосын удирдагч Ким Жон Ун урилга хүлээж авсан даруйдаа Цагаан ордонд айлчлахыг хүсч буйгаа илэрхийлжээ. Тэрээр “Хоёр Солонгосын түүхэн мөргөлдөөнийг зогсоохыг хүсч байна. Мөн пуужин харваж Өмнөд Солонгосын ерөнхийлөгчийг дахин шөнөөр сэрээхгүй” хэмээн амлажээ.Түүнчлэн удирдагч Ким Жон Ун хэлэхдээ “Би мөргөлдөөнийг зогсоохоор ирсэн” гэж онцлов. Харин Хойд Солонгосын удирдагчийн дүү Ким Ё Жон хэлэлцээрийн үеэр хоёр Солонгосыг нэгтгэх үйл явцыг хурдлуулах санал тавьсан талаар Өмнөд Солонгосын ерөнхийлөгчийн ордны хэвлэлийн албаныхан уламжилсныг “Тасс” агентлаг эш татан мэдээллээ. Түүнчлэн Өмнөд Солонгосын ерөнхийлөгч Мүн Жэ Ин Хойд Солонгосын удирдагч Ким Жон Унтай байнга хурал, хэлэлцээр хийж уулзаж байхыг дэмжиж буйгаа илэрхийлсэн байна.  Тэрээр солонгосчуудын ариун газар болсон БНХАУ-тай хилтэй ойрхон байдаг Хойд Солонгосын “Пэкту” ууланд очихыг хүсч байгаагаа мэдэгдсэн талаар “Ёнхап” агентлаг мэдээлсэн байна. Энэ уул нь Солонгосын ард түмний гарал үүслийн тухай эртний домогт гардаг уул аж. Мөн хоёр орны төлөөлөгчид уулзалтын эхний өдөр  Хойд Солонгосын цөмийн зэвсэггүй бүс болгох, энхтайвныг бүрмөсөн тогтоох талаар хэлэлцсэн гэж “Тасс” агентлаг уламжлав. Тэд хэлэлцээр өндөрлөх үеэр хамтарсан мэдэгдэлд гарын үсэг зурах юм.  Эх сурвалж: actualidad.rt.com