МОСКВА, Дөрөвдүгээр сарын 25 - РИА Новости. АНУ-ын Сангийн яам хоригийг зөөлрүүлсний дараа "РусАл"-ын хөнгөн цагааны томоохон худалдан авагч Швейцарийн түүхий эдийн трейдер Glencore Оросын компанийн металлын худалдан авалтаа сэргээлээ хэмээн нөхцөл байдлыг сайн мэдэх эх сурвалжид үндэслэн Блумберг агентлаг бичиж байна. Яамны мэдэгдэл нь тус компанийг "РусАл"-тай аравдугаар сарыг дуустал хамтран ажиллаж болно гэж байгаа хэрэг хэмээн үзэхээр Glencore-ын удирдлага ийн шийдвэрлэжээ. Гэсэн хэдий ч хөнгөн цагааны зах зээл дэх РИА-Новости– гийн эх сурвалж энэ мэдээллийг үгүйсгэв. “Форс-мажор буюу гэнэтийн давагвашгүй хүчин зүйл гарч ирснийг  зарласан мөчөөс хойш Glencore-т юу ч өөрчлөгдөөгүй, худалдан авалт сэргээгүй” хэмээн тэр өгүүлэв. Харин Glencore тайлбар хийхээс татгалзаж, "РусАл" сэтгүүлчдийн асуултад шуурхай хариулсангүй хэмээн тус агентлаг онцлов. Дөрөвдүгээр сарын эхээр АНУ-ын тогтоосон хоригт "РусАл" хамрагдсан бөгөөд уг хоригт активуудыг царцаах, энэ компанитай хамтарч өрийн болон хувьцааны арга хэрэгслээр явуулдаг бүх төрлийн ажиллагааг оролцуулан америкийн иргэдэд хамаатай аливаа бизнес эрхлэхийг хориглох зэрэгарга хэмжээ багтсан юм. Үүний дараа компанитай байгуулсан контрактыг дахин авч үзэх болсон тухай "РусАл" – ын хэд хэдэн сөрөг агент мэдээлэв.Тухайлбал, Австрали-Британийн  RioTinto АНУ-ын Сангийн яамны хориг тавьсан жагсаалтад багтсантай нь холбогдуулан "РусАл"-тай байгуулсан зарим контрактаар форс мажор зарлахаа мэдэгдсэн бөгөөд энэ тухай Glencore ч бас мэдэгдсэн байна. Норвегийн NorskHydro өнгөрсөн долоо хоногийн баасан гарагт Оросын компанитай байгуулсан контрактыг дахин авч үзэх, тэдний заримтай нь форс - мажор зарлахаа мэдэгдэв. OFAC (АНУ-ын Сангийн яамны гадаадын активт хяналт тавих газар)-ын сайтад нийтлэгдсэн баримт бичигт зааснаар "РусАл"-ын эсрэг авсан хориг арга хэмжээний хүрээнд Америкийн иргэд, компаниуд аравдугаар сарын 23-ны дотор бүх контракт, тус компанитай хамтарсан үйл ажиллагааг зогсоохоор хугацааг сунгасан. Анх тогтоосон хугацаа тавдугаар сарын 5-ны дотор байсан. Үүнээс гадна, хэрвээ Оросын тэрбумтан Олег Дерипаска компанид тавих хяналтаасаа татгалзвал "РусАл"-ын эсрэг тавьсан хоригоо АНУ бүрмөсөн цуцалж ч болох юм хэмээн тус байгууллага мэдэгджээ. Эх сурвалж: www.polit.mn