Х.ОЮУНБОЛД Украйны ерөнхийлөгч Петр Порошенко  Чернобылийн атомын төв цахилгаан станц дэлбэрээд 32 жил болж байгаатай холбогдуулан ослын хохирогчдод хүндэтгэл үзүүлсэн байна.  Тэрээр гамшигт өртсөн бүс нутгийг шинэ технологи хөгжсөн газар болгохыг уриалжээ. Түүнчлэн “Украйн  болон дэлхий ертөнц 1986 оны дөрөвдүгээр сарын 26-нд болсон аймшигт үйл явдлыг хэзээ ч мартахгүй” гэв.  Мөн “Чернобылийн осол нь Украйн болон олон хүний сэтгэл зүрхэн дэхь эдгэршгүй шарх үргэлж байсаар байх болно” хэмээн ерөнхийлөгч Петр Порошенко фэйсбүүк цахим хуудастаа нийтэлсэн талаар “Ukrinform” агентлаг мэдээлэв. Украйны ерөнхийлөгч энэ аймшигт үйл явдлыг дахин гаргахгүйн тулд боломжтой бүхнийг хийх хэрэгтэй гэж онцлоод “Бид энэ болсон үйл явдлаас суралцах ёстой” гэжээ. Харин “Одоогийн Чернобыль хот шинэ техник технологи хөгжсөн газар нутаг болж өөрчлөгдөх ёстой хэмээв. Чернобыль хотын атомын цахилгаан станцын төвийн дөрөвдүгээр ректорын хэсэг болон хөдөлгүүрийн өрөөнд химийн хүчтэй дэлбэрэлт болсон гэж бүртгэгдсэн юм. Хэдийгээр гал сөнөөгчид гарсан гал түймрийг унтраасан ч ректорт гарсан гал тавдугаар сарын 10 хүртэл унтраагүй хэвээр байсан аж. Мөн үүний улмаас цацраг идэвхт бодис Украйны газар нутгийг хучиж, Белорусс, ОХУ болон Австри, Норвеги, Герман, Финлянд, Грек зэрэг Европын орнуудад хүрсэн юм. Эх сурвалж: “Зууны мэдээ” сонин