Г.Ундрам Мэргэжлийн боловсролын сургуулиудын ажиллагсдын эрхийг хамгаалах түр хорооноос өнөөдөр хэвлэлийн бага хурал хийлээ.  Хорооны тэргүүн Д.Бямбаа “Монгол улсад эрх зүйт төрийн үнэт зүйлс үгүй болж, хууль дээдлэх ёс алдагдан, улс төрч гэгдэх цөөнхийн дураар авирлах болсон үйлдэл хэрээс хэтэрч нийгэм, эдийн засгийн чухал тогтолцоо үндсээрээ сүйрлийн ирмэгт туллаа.  Сайд С.Чинзоригийн увайгүй үйлдэл, хувийн ашиг сонирхол давамгайлсан хандлага нь  Монгол улсад хөдөлмөрийн зах зээлийн системийг устгаад зогсохгүй Монголын ажиллах хүчний ирээдүйг бэлтгэдэг МСҮТ, политехникийн коллежуудын чадавхийг урьд хожид байгаагүйгээр доройтууллаа” гэв. МСҮТ, политехникийн коллежид элсэгчдийн тоо 20 гаруй хувиар буурч, төгсөөд ажилд орох үзүүлэлт буурсаар 40 гаруй хувьд  хүрсэн гэх мэдээллийг мөн өгч байв.  Мөн тэрээр үргэлжлүүлэн “Захирал, багш нарыг нэг удаагийн бээлий адил сольж 2012 оноос хойш таван хичээлийн жилд Монгол Солонгосын политехникийн коллежид  10 захирал сольсон. Мөн хөдөлмөр эрхлэлтийг дэмжих сангаас МСҮТ-ийн суралцагч нарт олгодог байсан 70 мянган төгрөгийн тэтгэмжийг зогсоож, дээрх санд жил бүр төвлөрдөг  80 гаруй тэрбум төгрөгийг хэрхэн зарцуулсан нь тодорхой бус байна. Ажилгүйдлийн, үйлдвэрлэлийн ослын эсрэг хуримтлал ихтэй чөлөөт сангуудыг төрийн санд төвлөрүүлэхгүй байж болзошгүй гэсэн мэдээлэл бидэнд байгаа. Эдгэрийг зохих газарт нь шалгуулахын зэрэгцээ сайдын хууль бус шийдвэрээр ажлаасаа халагдсан хүмүүсийн гурван шатны шүүхийн шийдвэр гараад байхад Төрийн албаны хууль, Шүүхийн шийдвэр гүйцэтгэх хууль, Зөрчлийн хууль, Захиргааны ерөнхий хуулийн заалтуудаа удаа дараа ноцтой зөрчсөн ийм хүн салбар хариуцсан сайд байх ёс зүйн  эрхгүй” гэлээ. Эх сурвалж: www.polit.mn