Х.ОЮУНБОЛД АНУ-ын ерөнхийлөгч Дональд Трамп  Хойд Солонгосын удирдагч Ким Чён Унтай Солонгосын хойгийг цөмийн зэвсэггүй бүс нутаг болгох талаар гэрээ байгуулах уулзалт ирэх сард эсвэл зургадугаар сарын эхээр болно гэдэгт итгэлтэй байна гэжээ. Тэрээр энэ талаар Цагаан ордон дахь ажлынхаа өрөөнд хийсэн хурлын үеэр  хэвлэлийнхэнд мэдэгдсэн байна. Мөн “Хоёр тал бие биедээ хүндэтгэлтэй хандана гэж бодож байна. Түүнчлэн Солонгосын хойгийг  цөмийн зэвсэггүй бүс нутаг болгох гэрээг хийнэ гэдэгт  итгэж байна” гэв. Үүнээс гадна тэдний энэ удаагийн уулзалт нь олон жилийн турш хийж ирсэн хурал, уулзалтаас өөр болно гэдэгт  итгэж байгаагаа илэрхийлжээ.  Мөн “Энэ уулзалт нь  бүхний сонирхлыг  татсан уулзалт болно” гэснийг “EFE” агентлаг мэдээлсэн байна. Ерөнхийлөгч Дональд Трамп энэ мэдэгдлээ удирдагч Ким Чён  Ун Хойд Солонгосын ажилчдын намын хурлын үеэр Вашингтон, Пхеньяны ирээдүйн харилцааны үр дүнг шинжлэн хэлэлцэхээс өмнө хийсэн байна.  Харин одоогоор тэдний уулзалт хаана болох нь тодорхойгүй байгаа юм   Ойрын өдрүүдэд олон улсын хэвлэл мэдээллийн хэрэгслээр тэдний хийх уулзалт Монгол Улсын нийслэл Улаанбаатар хотод болох боломжтой гэж яригдаж эхэлжээ. Эх сурвалж: “Зууны мэдээ”  сонин