Б.ТӨГС Үндэсний аудитын газраас Нийслэлийн авто замын хөгжлийн газарт хэрэгжсэн зарим хөрөнгө оруулалтын төсөл, арга хэмжээний хэрэгжилтэд аудит хийжээ. Аудитад хамрагдсан 90.3 тэрбум төгрөгийн төсөвт өртөгтэй 16 төсөл, арга хэмжээний 88.3 тэрбум төгрөгийн гэрээний санхүүжилтийг тулгахад 13 төсөл, арга хэмжээнд Хөгжлийн банкнаас 1.3 тэрбум, улсын төсвөөс 30.5 тэрбум, нийслэлийн төсвөөс 29.8 тэрбум, нийт 61.5 тэрбум төгрөгийн санхүүжилтийг гүйцэтгэлээр гэрээний дагуу олгосон. Харин гэрээний дагуу ажил дуусч, улсын комисс хүлээж авсан 5 төсөл, арга хэмжээний 26.8 тэрбум төгрөгийн санхүүжилт одоог хүртэл олгогдоогүй байна. Үүнд Гүнтийн давааны авто замын үргэлжлэл 7.36 км авто замыг барьсан “Билэгт зам” ХХЗ 10.6 тэрбум, Өвөр гүнтийн 11 км авто замыг барьсан “Арц Суврага” ХХК 13.3 тэрбум, Гандийн гудамжны авто замыг барьсан “Хомын тал” ХХК 489 сая, мөн тус замыг барьсан “Үйлсийн зам” ХХК 534 сая, Яармагаас Жаргалантын ам орох 3.4 км авто зам, 400 автомашины зогсоолын барилгын ажлыг гүйцэтгэсэн “Наранбулаг Хан” ХХК 1.7 тэрбум төгрөгийн санхүүжилтээ аваагүй байна. Эх сурвалж: www.polit.mn