Д.АРИУН Монгол Улсын Ерөнхийлөгч Х.Баттулгын зүгээс санаачлан цаазын ялыг холбогдох зарим хуульд сэргээн оруулах тухай хуулийн төслийг санаачлан УИХ-д өргөн барихаар болоод байгаа. Тодруулбал, Эрүүгийн хуульд нэмэлт өөрчлөлт оруулах замаар хүүхдийг хүчирхийлэх гэмт хэрэгт оноох ялыг чангатгаж, энэ төрлийн гэмт хэрэгт цаазаар авах ял оноох нь зүйтэй гэдэг шийдлийг Ерөнхийлөгчийн зүгээс гаргаж байгаа юм. Эрүүгийн хуульд энэ чиглэлээр оруулах нэмэлт өөрчлөлтийн тухай хуулийг Монгол Улсын Ерөнхийлөгчийн зүгээс санаачлан УИХ-аар хэлэлцүүлэхээр оруулах нь тодорхой болсон гэдгийг өчигдөр /2018.4.2/ зөвлөх Г.Уянгаа нь зарласан. Цаазын ялын талаар Хууль зүйн сайд асан Х.Тэмүүжин өөрийн сошиал хуудастаа үзэл бодлоо ингэж илэрхийлжээ. Тэрээр “Хөгжил дэвшил гэдэг ухрах бус, урагшилж өөрчлөгдөхийг хэлдэгсэн. Хуучнаа сэргээж, ирээдүйг хойшлуулахаа “Бид ялсан гэж боддог”, манай талынхан хийж байгаа бол хулгай луйвар шударга, бусад нь хийсэн бол алаад өг” гэх мафи маягийн нөхөд төрийн толгойд суучихаар толгойгүй төр өөрсдөөсөө бусдад ална хураана, буцаана гэхээс өөр үггүй болдог бололтой” гэсэн байна. Мөн тэрээр “Өөрсдөө шүүхэд дуудагдахаараа тэдний шударга бусыг гайхах, өрөөлийг болохоороо тэр шүүхээрээ цаазлуулах гэж улайрах. Хуулийн ажилд хүн нь хэндээ бус, асуудал нь юундааг хараад сурчих нь зүгээр байдаг” гэх мэтээр бичсэн  байна. Х.Тэмүүжингийн энэ постууд нь цаазын ялыг  дэмжсэн болон эсэргүүцсэн олон хүн байр сууриа илэрхийлэх бичил хэлэлцүүлгийн талбар болсон байна. Эх сурвалж: www.polit.mn