М.БААСАНДЭЛГЭР “Улсаа аврах ард түмний үндэсний хөдөлгөөн”-өөс  цаг үеийн асуудлаар мэдээлэл хийлээ. Тэд одоогийн УИХ-ыг Монгол Улсын аюулгүй байдал, хил хязгаар, газар нутгийн бүрэн бүтэн байдал, иргэдийн эрх, эрх чөлөөнд ноцтой аюул занал учруулаад зогсохгүй, баялгийн тэгш бус хуваарилалт бий болгож, үндэсний эв нэгдлийг сарниулсан гэж үзжээ. Тиймээс тус хөдөлгөөн болон “Монголын нам бус иргэдийн нэгдсэн холбоо”-ны залуус нэгдэж УИХ-ыг тарахыг тулгасан шаардах хуудсыг УИХ-ын дарга М.Энхболдод өнөөдөр өргөн барьж, мөн Ерөнхийлөгчөөс онц байдал зарлахыг шаардаж байгаагаа илэрхийлэв. “Улсаа аврах ард түмний үндэсний хөдөлгөөн”-ий ерөнхий зохицуулагч Б.Жагар “Манай хууль хяналтын байгууллага өөрсдөө оффшорчдын гар, хөл болсон учраас шудрага үнэнийг тогтоож чадахгүй байна. Өнгөрсөн шөнө С.Баярцогтыг барьж хорьсон нь зүгээр л түр зуурын шоу. Яг энэ засаглал байгаа цагт хэзээ ч тэр хүн шоронд орохгүй. Харин бидний үеийн залуус хувьсгал хийх юм бол бүх хулгайч нарыг байх ёстой газар нь аваачиж чадна” гэлээ. УИХ-ын хаврын чуулган эхлэх дөрөвдүгээр сарын 5-ны өдөр Төрийн ордны баруун, зүүн хаалганы үүдэнд улс төрийн суулт хийнэ. Төрийн ордон руу Ерөнхийлөгчөөс өөр хүн оруулж, гаргахгүй гэдгээ мэдэгдсэн юм.