Д.АРИУН Хятадын төв телевизээр БНХАУ-ын дарга Ши Жиньпин, БНАСАУ-ын удирдагч Ким Чен Ун нарын уулзалтын зураг бичлэг цацагдаж, Хойд Солонгосын удирдагчийн Бээжинд хийсэн нууцлаг айлчлалын мэдээлэл ил болсон талаар Оросын “Риа Новости” агентлаг мэдээллээ. Лхагва гариг /III.28/-ийн өглөө Хятадын Синхуа агентлаг Хойд Солонгосын удирдагч Ким Чен Ун гэргийн хамт Хятадад гурав хоногийн албан бус айлчлал хийсэн талаар мэдээлсэн байна. Энэ мэдээлэл цацагдсаны дараа Хятадын Гадаад хэргийн яамны сайтад албан мэдээ орсон байна. Хойд Солонгосын удирдагчийн хувьд засгийн эрх мэдлийг авсан 2011 оноос хойш анх удаа гадаад улсад хийж байгаа айлчлал нь энэ гэдгийг олон улсын хэвлэлүүд онцлон бичиж байна. Хоёр улсын удирдагчдын уулзалт Хятадын ардын хурлын ордонд болсон бөгөөд уулзалтын үеэр яригдсан асуудлын талаар “Ши Жиньпин   Ким Чен Уныг Хятадад дахин айлчлахыг урьжээ” гэдгээс илүү тодорхой мэдээлэл гараагүй байна. Өмнөд Солонгос болон АНУ-тай дээд хэмжээний уулзалт хийхээр товлоод байгаа  үедээ Хойд Солонгосын удирдагч Хятадад гэнэтийн айлчлал хийсэн. Тиймээс  Ши Жиньпин, Ким Чен Ун нар ямар асуудлаар яриа хэлэлцээ хийсэн бэ гэдэг нь олон улсын хэмжээнд анхаарал татсан асуудал сэдэв болоод байна. Даваа гариг /III/25/-ны өглөө Хойд Солонгосын удирдагчийн тусгай галт тэрэг Бээжинд ирсэн талаар Японы хэвлэлүүд мэдээлж, нийгмийн сүлжээний хэрэглэгчид Бээжингийн галт тэрэгний буудал орчмын харуул хамгаалалт нэмэгдсэн зургуудыг  оруулж байсан ч хоёр талаас албан ёсоор ямар нэгэн мэдээлэл тайлбар өгөхгүй байсан билээ. Эх сурвалж: www.polit.mn