Х.ОЮУНБОЛД Баянзүрх дүүргийн Ардчилсан намын дарга нар болон намын дотоод сонгуульд нэр дэвшигчдийн төлөөлөл өчигдөр /03.26/ болсон сонгуулийн талаар хэвлэлийн хурал хийлээ. Энэ үеэр Баянзүрх дүүргийн Ардчилсан намын хорооны даргын үүрэг гүйцэтгэгч М.Далайцэрэн “Баянзүрх дүүргийн сонгууль өчигдөр явагдсангүй. Учир нь энэ дүүрэгт дотоод сонгуулийг зохион байгуулах явцад үндсэн дүрмийн олон зөрчил гарлаа. Бид өнгөрсөн долоо хоногт намын дарга, ерөнхий бичгийн дарга болон дотоод сонгуулийн дарга нарт үндсэн дүрмээ биелүүлж ажиллахыг шаардаж, цуглаан зохион байгуулсан. Энэ таван зүйл бүхий шаардлагыг намын удирдлагуудад хүргүүлсэн боловч ямар ч хариу өгсөнгүй. Улмаар өчигдөр дотоод сонгуулийн хорооноос Баянзүрх дүүргийн ротацийн сонгуулийг зохион байгуулах гэж оролдлоо хэмээн мэдэгдсэн юм. Энэ дүүрэгт Ардчилсан намын 10 мянга орчим идэвхтэй гишүүн байдаг. Яг өнөөдрийн байдлаар идэвхтэй, гишүүнийхээ эрх нь нээгдсэн, татвар төлсөн  5300 гаруй бүртгэлтэй гишүүн байдаг. Гэтэл өчигдөр энэ дүүргийн Хэрэг эрхлэх газрын даргаар томилогдсон н.Бадрах өмнө нь нам бус байсан болон Монгол ардын  намд гишүүнчлэлтэй байсан хүмүүст хуурамч үнэмлэх олгож, сонгуулийн дотоод явцыг өөрт ашигтайгаар хийхийг оролдлоо” гэв. Энэ талаар төв намаас Баянзүрх дүүргийн дотоод сонгууль хийгдсэнгүй гэсэн мэдээлэл хийж байгаа. Манай намыг байгуулагдсан цагаас нь өнөөдрийг хүртэл хүчин зүтгэж яваа гишүүд сонгуульд санал өгөх гэж очсон. Гэвч тэдний нэр жагсаалтад байгаагүй. Энэ сонгуульд нэр дэвшсэн хүмүүс хэнд саналаа өгөхөө мэдэхгүйгээр оролцох боломж бүрдсэн юм гэв. Энэ мэтчилэн будлиантай байсан учраас  дүрмийн хүрээнд  үйл ажиллагаагаа явуулаач гэсэн шаардлагыг тавьсан. Баянзүрх дүүргийн сонгуулийн гурван байранд Ардчилсан намын нэг ч гишүүн санал өгсөнгүй. Иймээс  сонгууль явагдсангүй гэж албан ёсоор мэдэгдэж байгаагаа уламжилсан юм. Тэрээр “Бид цаашид дүрмийн хүрээнд хүчин төгөлдөр гишүүдээ оролцуулсан ротацийн сонгууль хийх хүртэл шаардлага тавих болно гэлээ. Ардчилсан нам нь гишүүн төвтэй нам боллоо гэж намын удирдлагууд мэдэгдэж байгаа. Гишүүн төвтэй нам юм бол гишүүдийнхээ эрхийг дээдэлдэг, үгийг нь сонсдог байх ёстой гэж байлаа. Намын дарга гишүүдээсээ сонгогдсон. Намын дүрмийг гишүүдийн төлөөлөл, намын их хурлаар баталсан. Тэгэхээр удаа дараалан дүрэм, шаардлагыг зөрчиж байгаа энэ асуудлыг цаашдаа бид шат шатны тэмцлийн хэлбэрийг сонгон дүрмээ биелүүлдэг намын удирдлагатай болтол тэмцэнэ гэж мэдэгдэв. Энэ хуралд  тус намын Баянзүрх дүүргийн ХIХ дүгээр үүрийн дарга Ж.Батцэнгэл, нэр дэвшигчдийн төлөөлөл  Э.Цолмонбаяр нар оролцсон юм. Эх сурвалж:www.polit.mn