Т.САЙХАН Монголын үндэсний бөхийн холбооны тэргүүн Р.Нямдорж шүүхийн шийдвэрийг биелүүлэхгүй байгаа учраас Шүүхийн шийдвэр гүйцэтгэх газраас албадан шүүхийн шийдвэр биелүүлэх ажиллагааг өнөөдөр /03.22/ явуулж байна.  Одоогоор бөхийн өргөөнд эмх замбараагүй байдал үүсээд байна.  Шүүхийн шийдвэр гүйцэтгэх албанаас шүүхийн захирамжийг гардуулж өгөхөөр Бөхийн өргөөнд очжээ.  Гэвч МҮБХ-ны тэргүүн Р.Нямдорж тэднийг щ нэвтрүүлэхгүй, саад учруулж байгаа талаар Баянзүрх дүүргийн шүүхийн шийдвэр гүйцэтгэх албаны ажилтан хэлж байна.   Тэрээр “ Шүүхийн шийдвэрийг МҮБХ-ны дэд тэргүүн Д.Данзанд өчигдөр гардуулж өгсөн. Өнөөдөр Р.Нямдорж гуайд өөрт нь өгөх гэж ирэхэд эсэргүүцэл үзүүлсэн байдалтай байна. Төрийн байгууллагын үйл ажиллагаанд саад учруулж, дотогш нэвтрүүлэхгүй байгаа учраас цагдаагийн байгууллага хүч нэмэгдүүлээд ирчихсэн байна. Дэд тэргүүнээр дамжуулж, мөн утсаар нь нь мессеж илгээж мэдэгдсэн. Хэрвээ гарч ирж, эсвэл биднийг дотогш оруулж захирамжаа хүлээж авахгүй бол дараагийн арга хэмжээгээ авна” гэлээ. Уг шүүхийн шийдвэрийн захирамжид энэ сарын 24-нд хуралдахаар товлоод буй “Их эе”-ийг шүүхийн шийдвэр гартал түр хугацаанд түдгэлзүүлсэн, мөн МҮБХ-ны тамга тэмдгийг Р.Нямдорж гуайг ашиглахгүй байхыг  тусгажээ. Эх сурвалж:www.polit.mn