Д.АРИУН Их Британийн Ерөнхий сайд Тереза Мей өчигдөр “ОХУ-ын 23 дипломат ажилтныг улсаасаа гаргана” гэдгээ мэдэгдлээ. Их Британийн засаг захиргаа Оросын  дипломат ажилтнуудыг тагнуулын үйл ажиллагаа явуулдаг гэж үзэж ийм шийдвэр гаргасан байна. Тэднийг Их Британийг орхин явахад долоо хоногийн хугацаа өгчээ.  Мөн Их Британи улс Хөлбөмбөгийн ДАШТ-д төрийн өндөр албан тушаалтнууд болон Хааны гэр бүлийн зүгээс төлөөлөл оролцуулахгүй гэдгээ мэдэгджээ. Энэ нь ОХУ-д болох Хөлбөмбөгийн ДАШТ-тэй холбоотойгоор тодорхой хэмжээний бойкот зарлаж байгаагийн илрэл гэдгийг олон улсын хэвлэлүүд онцолсон байна. Их Британид амьдарч байсан Оросын экс тагнуулч болон түүний охин нар үл мэдэгдэх бодист хордсон байдалтайгаар олдсоноос хойш хоёр улсын харилцаа хүйтрээд байгаа юм. Экс тагнуулчийг цэргийн зориулалт бүхий хороор хордуулсан, уг хорыг ОХУ-д үйлдвэрлэсэн гэж Их Британи үзэж байгаа юм. Харин ОХУ үүнийг албан ёсоор няцаасаар байгаа билээ. Үл мэдэгдэх бодист хордож ухаангүй олдсон С.Скрипаль нь 2004 онд ОХУ-д эх орноосоо урвасан, гадаад улсын төлөө тагнуулын үйл ажиллагаа явуулсан хэргээр баривчлагдаж шүүхээс 13 жил хорих ял шийтгүүлж байжээ. Харин 2010 онд АНУ болон ОХУ-ын хооронд тагнуулын хэргээр баривчлагдсан хүмүүсийг солилцох солилцооны хүрээнд АНУ руу гарсан бөгөөд түүнээс хойш Их Британид амьдарч байсан аж. Эх сурвалж: www.p0lit.mn