М.БААСАНДЭЛГЭР Монголбанкны захиалгаар Үл хөдлөх хөрөнгийн Тэнхлэг зууч компанийн хараат бусаар хийсэн “Орон сууцны үнийн индекс”-ийн (ОСҮИ) судалгааны 2018 оны нэгдүгээр сарын үр дүнг олон нийтэд танилцууллаа. Тус судалгаагаар өнгөрсөн нэгдүгээр сард Орон сууцны үнийн ерөнхий индекс 1.015 болж суурь үе буюу 2013 оны нэгдүгээр сараас 1.5 хувиар өслөө. Энэ нь өмнөх сараас 0.25 хувиар, өнгөрсөн оны мөн үетэй буюу 2017 оны нэгдүгээр сарын үр дүнтэй харьцуулахад 3.53  хувиар өссөн байна. Харин үнийн индексийн үзүүлэлтийг шинэ орон сууц, хуучин орон сууцаар ангилж үзвэл: Шинэ орон сууцны үнийн индекс 1,164 гарсан. Энэ нь өмнөх сараас 0.02 хувиар, өнгөрсөн оны мөн үетэй харьцуулбал 3.28 хувиар өссөн байна. Хуучин орон сууцны үнийн индекс 0,923. Суурь үеэс 7.74 хувийн бууралттай гарлаа. Харин өмнөх сараас 1.16 хувиар, өнгөрсөн оны мөн үеэс 0.30 хувиар өссөн үзүүлэлт юм. Орон сууцны үнийн индекс, 2018 оны нэгдүгээр сар

Үзүүлэлт	Ерөнхий	Шинэ о/с	Хуучин о/с
Индекс	1,015	1,164	0,923
Индексийн өөрчлөлт /суурь үе-2013.01/	1,54%	16,41%	-7,74%
Өмнөх сартай харьцуулахад	0,25%	0,02%	1,16%
Оны эхэнтэй харьцуулахад	0,25%	0,02%	1,16%
Өмнөх оны мөн үетэй харьцуулахад	3,53%	3,28%	0,30%

ОСҮИ-ийг Хедоник регрессийн аргаар тооцоолсон бөгөөд энэхүү тооцоололд тухайн сард Улаанбаатар хотод борлуулагдахаар зах зээлд нийлүүлэгдсэн шинэ, хуучин нийт 4751 орон сууцны мэдээллийг хамрууллаа.