Г.НAСАНБААТАР MNBA Үндэсний лигийн аваргын төлөөх цувралын дөрөв дэх тоглолт өчигдөр /02.26/ боллоо.  “Архангай Алтан Дорнодын Дайчид” цувралыг 2:2 болгож чадлаа. Тоглолт 105:89 харьцаатай “Ховд Шонхорууд”-ын ялагдлаар өндөрлөсөн юм. Тоглолтын онцлох тоглогчдоор  “Архангай Алтан Дорнодын Дайчид” багийн Jepp Newberry, Э.Цэвэлдорж нар  23 оноогоор багаа тэргүүлсэн бол ОУХМ Б.Билгүүн 15 оноо авлаа. Уг тоглолтод туршлагатай тоглогч Э.Цэвэлдорж үүргээ сайн гүйцэтгэсэн гэхэд буруудахгүй. Харин “Ховд Шонхорууд” багийн BJ Young 33 оноо авч бүх тоглогчдыг тэргүүлсэн ч  баг нь хожигдсон. Тэрээр өмнөх тоглолтод мөн бүх тоглогчдыг оноогоор тэргүүлж байлаа.  Харин “FIBA” 3х3  Азийн аваргын алтан медальт, үнэ цэнэтэй тоглогч Э.Дөлгөөн 17 самбараас бөмбөг авалтаар тэргүүлсэн юм. Тэрээр дөрвөн тоглолт дараалж 10-аас дээш самбараас бөмбөг авалтаар дабл хийгээд  байна. Хоёр багийн тоглолт эхнээсээ довтолгоонд тулгуурлан эхэлж дайчид эхний хагасын төгсгөлийг сайн хийж чадсан. Тиймээс хамгаалалт сайн болж эсрэг багаа хоёрдугаар үед ердөө 14 оноо авахуулсан нь хожлын нэг шалтгаан болсон гэхэд болно.   Мөн аваргын төлөөх тоглолтыг хөгжөөн дэмжигчгүйгээр зүйрлэхийн аргагүй. Тиймээс ордонд цугласан хөгжөөн дэмжигчид багийн уур амьсгалыг сэргээж байв. Хоёр багийн дараагийн тоглолт МҮЭСТО-нд  ирэх лхагва гарагт болно. Эх сурвалж:www.polit.mn