Т.САЙХАН АТГ-аас  өчигдөр /02.26/ мэдээлэл хийж, оффшор бүсэд данстай эрхмүүд эхнээсээ мэдүүлэг өгч эхэлсэн гэлээ.  Одоогоор 17 төрийн албан тушаалтан  данстай гэдгээ мэдэгдсэн бөгөөд түүний хоёр нь УИХ-ын гишүүн юм.  Одоогоор АТГ-аас хэн гэдэг албан тушаалтан гэдгийг зарлаагүй байна. Эх сурвалжийн мэдээлснээр  УИХ-ын гишүүн Сү.Батболд, Б.Дэлгэрсайхан нар оффшор дансаа мэдэгдсэн байж магадгүй юм  байна. Мөн  Монголбанкны нэр бүхий албан тушаалтан ч эдгээр 17-д багтаж байна.  Тэд өөрсдийн хамаарал бүхий этгээдийн эзэмшиж байсан оффшор бүсэд бүртгэлтэй компанийн хувьцааг 2015, 2017 онд бусдад зарж, борлуулсан тухай мэдүүлсэн. УИХ-ын нэг гишүүний Сингапурт суралцдаг хамаарал бүхий этгээд, Швейцарийн холбооны улсад суугаа ЭСЯ, НҮБ-ын Женев дэх төв болон олон улсын бусад байгууллагын дэргэд суугаа Байнгын төлөөлөгчийн газар, БНХАУ-ын Засаг захиргааны онцгой бүс Хонконгт суугаа ЕКГ, Сингапур дахь ЭСЯ-нд ажиллаж байгаа 11 албан тушаалтан, Гаалийн ерөнхий газар, АТГ-ын тус бүр нэг албан тушаалтны хамаарал бүхий этгээд Хонконг, Ирландад ажиллаж амьдарч байгаа тул банканд данс эзэмшиж байгаа талаар мэдэгдээд байна. Оффшор бүсийг Засгийн газраас тогтоодог. 2017 оны арванхоёрдугаар сарын 6-нд 15 улсыг офшор бүсээр нэмж бүртгэсэн бөгөөд энэ өдрөөс хойш оффшор бүс дэх дансаа мэдүүлэх тоолуур гүйж эхэлсэн. Тоолуурын цикл ирэх дөрөвдүгээр сарын 6-нд дуусах бөгөөд энэ хугацаанд мэдүүлгээ ирүүлэх ёстой байна.  Ямартай ч  нууц данстай эрхмүүд оффшор дахь хөрөнгөө мэдүүлээд эхэлсэн байна. Эх сурвалж:www.polit.mn