Шилдэг эшлэл

Монголын уламжлалт баяр Цагаан сар, өглөг, буян болоод хувь хүн хэрхэн зөв байх тухай шашны зүтгэлтнүүд, зурхайчид байр сууриа тус, тус илэрхийлж байна. Бид энэ удаа “Жавзандамба хутагт” төвийн багш, гавж Д.Нямсамбуугийн хэлсэн шилдэг эшлэлүүдийг хүргэж байна.

1. Хамгийн их үндэсний агуулгатай, бидний  хоорондоо ижилсэх, бусдаас ялгарах тэр баяр бол Цагаан сар юм. Бид  аль болохоор ижилсэх хэрэгтэй, нэгдэх хэрэгтэй.
2. Заавал шинийн 15-нд багтаж засал  хийлгэх албагүй. Гол нь  хүн өөрөө зөв байх нь  л чухал.

3. Зөв үйлдэл бүхэн аз жаргалын шалтгаан болдог.
4. Гэгээрэл гэж шуналыг ялахын нэр.
5. Монголчууд номд мөргөх дуртай. Номд мөргөх сайн л даа. Гэхдээ энэ нь номыг эрхэмлэх, мэдлэгийг үнэлэх үнэлэмжийг сургах анхны дасгал.

6. Гүрэм ном уншуулна, засуулна гэж монголчууд ярьдаг. Энэ ойлголт Шри Ланкийн Буддизмаас эхлээд Японы буддизмд хүртэл байдаг. Тэр ч битгий хэл, Бурхан багшийн өөрийнх нь сургаалд ч байдаг.
7. Бурханы шашин гэдэг бодлын, сэтгэлийн сургууль юм.
8. Бурханы шашинд хүн өөрөө үйлдэх, бусдаар үйлдүүлэх, бусдын үйлдэлд даган баясах гурав ижилхэн гэж үздэг.
9. Бурханы шашны бүх наминчлалд “нүгэл хилэнцийг өөрөө үйлдсэн бол, бусдаар үйлдүүлсэн бол, бусдын хийснийг даган баяссан бол түүнийгээ наманчилъя” гэдэг.
10. Ёс суртахуунтай байхын тулд нэн тэргүүнд хүмүүс хэзээ ч давдаггүй зарчимтай болох хэрэгтэй юм шиг санагддаг. Ямар ч зүйл болсон “би үүнийг хэзээ ч хийхгүй” гэсэн зарчим суухгүй бол юу ч тохиолдлоо гэсэн “би тийм болоод тэгсэн ш дээ” гээд л сууж байна
11. Би нийгэмд бүхэлд нь хүрч нөлөөлж чадах зүйл бол өнөөдөр Монголын нөхцөлд ганцхан Бурханы шашин гэж хардаг. Үүгээрээ би бүх хүнийг Буддист болгох санаа агуулаагүй. Мөн зөвхөн Бурхан шашинтан болж байж л хүн сая сайн хүн болдог гэж Бурханы шашин ч үздэггүй. Олонхид нөлөөлж чадах боломж, мөн ёс суртахууны үнэт сургаал хоёрын нийлбэр Буддизмд байна.

Эх сурвалж: www.polit.mn