Г.НАСАНБААТАР Монголын хог хаягдлыг дахин боловсруулах холбоо , “Хоггүй монгол” ТББ,“Сан-Оргиу” ХХК, болон НЭМҮТ-өөс гялгар уутны хор уршиг  болон түүнийг яаж дахин боловсруулах шийдлийн талаар өнөөдөр үндэсний мэдээллийн төвд мэдээлэл хийлээ. Гялгар уутыг шатаасан тохиолдолд их хэмжээний хортой химийн бодис агаарт дэгддэг аж. Улмаар генд нөлөөлж, эмэгтэй хүний хөхний хавдар үүсгэх, хүүхдүүдийн сэтгэн бодох чадварт сөргөөр нөлөөллөх, цаашлаад цусанд нэвтэрч орсон тохиолдолд цусны үйл ажиллагаанд сөргөөр нөлөөлж бусад эд эрхтэнг хордуулдаг байна. НЭМҮТ-ийн Эрдэм шинжилгээний ажилтан, доктор Ш.Батдэлгэр “Гялгар уутыг аль болох бага хэрэглэх, хэрэглэсэн тохиолдолд  эргээд худалдааны байгууллагууд хүлээж авдаг урамшуулалын систем байх хэрэгтэй. Эсвэл гялгар уутыг орлуулан цаасан уут хийх, дахин боловсруулах  шаардлагатай. Бид гялгар уутыг хэр хортой гэж ярихаас илүү, хэрэглээгээ хэрхэн бууруулах вэ гэдэг нь чухал” гэлээ. Харин нийлэг уутыг зөв хэрэглэвэл бат бөх бүтээгдэхүүн гардаг байна. Тухайлбал, Энэтхэг улс нийлэг уутаа хайлуулж  дахин боловсруулаад авто зам дэвсэхэд ашиглаж хамгийн бат бөх зам гаргадаг байжээ. Мөн “Сан-Оргиу” компанийн менежер Д.Болортунгалаг “Жилд 100-150 тонн гялгар уутыг дахин боловсруулдаг. Боловсруулсан гялгар уутаараа, сандал, хайсан хашаа, шон зэрэг гуч гаруй төрлийн бүтээгдэхүүн үйлдвэрлэж байна. Үүгээрээ тохижилтын ажлыг хийж байгаа. Өнгөрсөн жил хаягдсан нийт уутны 40-50 хувийг дахин боловсруулсан. Үлдсэн хэсэг нь байгальд хаягдсан хэмээн тэрээр хэлэв. Тиймээс гялгар уутаа бусад төрлийн хогтой нийлүүлж хаяхгүйгээр тусад нь багцалж хаяхыг “Хоггүй монгол” ТББ-ын тэргүүн М.Бүжинлхам зөвөллөө. Эх сурвалж: www.polit.mn