Т.САЙХАН АН-аас маргааш /02.01/ эрх баригчдын үйл ажиллагааны эсрэг тайван жагсаал цуглаан зохион байгуулах гэж байна.  Энэ талаар Ардчилсан намын дарга С.Эрдэнэ, МАХН-ын дэд дарга Ц.Оюунбаатар Ардчилсан намын Ерөнхий нарийн бичгийн дарга Ц.Туваан, УИХ-ын гишүүн Ж.Батзандан, Б.Пүрэвдорж, Д.Эрдэнэбат болон нар мэдээлэл хийв. Уг жагсаалыг МАХН дэмжиж оролцохоо энэ үеэр мэдэгдэв.  АН-ын дарга С.Эрдэнэ “Засгийн газрын 100 хоногийн үйл ажиллагаа сүр дуулиантай боллоо. Энэ Засгийн газрын 100 хоногт хийсэн 30 чухал ажилд нь бид судалгаа хийсэн. Энэ ажлын 80 хувь нь өмнөх Ж.Эрдэнэбатын Засгийн газрын үед хийсэн ажлуудыг оруулсан байна. Дээр нь ажил хийсэн дүр эсгэсэн. Жишээ нь С.Зориг агсны хэргийг илрүүлж, хариуцлага тооцсон гээд оруулчихсан байгаа юм. Энэ бол У.Хүрэлсүхийн Засгийн газрын хийсэн ажил биш. Харин Ц.Нямдорж захиалагчийг зарлана гэж байсан ч өнөөдрийг хүртэл алга. Сүржин мэдэгдэл хийж, даржин байдалтай байдгаа болимоор юм. Ц.Нямдорж 20 гаруй жил хууль зүйн сайд хийсэн. Энэ хүн таван удаа сайд хийхдээ монголын хууль зүйн салбарт ямар ахиц гаргасан бэ гэдэг нь бүрхэг харагддаг” гэв.  МАХН-ын дэд дарга Ц.Оюунбаатар “Улс орны эдийн засгийн хямрал, Засгийн газрын оновчгүй арга хэмжээг эсэргүүцэж энэ жагсаалд оролцоно. 2016 онд байгуулагдсан УИХ тарах ёстой гэдэг уриалгыг МАХН-аас гаргасан. Энэ парламент нэр хүндгүй байна. Хүчирхийлэгч, ёс суртахуунгүй, оффшорчид цугласан парламент болсон байна. Ард иргэдийн дийлэх нь УИХ-ыг тарах ёстой гэж үзэж байгаа учраас парламент тарах ёстой. Ардчилсан намынхан өөрсдөө үлгэрлэл үзүүлээд гишүүдээ татах байх гэж бодож байна” гэлээ. Эх сурвалж:www.polit.mn