Ц.МЯГМАРБАЯР Орон нутагт ашигт малтмалын олборлолт явуулахыг иргэд эсэргүүцэхээр эрх мэдэлтнүүдийн арга нь улам нарийсч хуулийн хүрээнд “луйвар“ хийсэн байдаг. Угтаа Ашигт малтмалын тухай болон захиргааны хэргийн тухай хуулиар нийтийн эрх ашигт нөлөөлөхүйц шийдвэр гаргах бол тухайн иргэдийн саналыг үндэслэж  шийдвэр гаргах ёстой гэсэн зохицуулалт бий. Гэтэл хуульд байхгүй журам гаргаад, түүндээ үндэслэн хууль бус  хайгуулын долоон тусгай зөвшөөрлийг  АМГТГ-ын дарга асан Д.Баатарцогт олгосон. Энэ асуудлыг хөндөж “Зууны мэдээ” сонинд “Журмаар халхавчилсан газрын тонуул” цуврал нийтлэлээр хүргэсэн билээ. Эдгээр нийтлэл болон Төв аймгийн Заамар сумын Төмөстий II багийн иргэн Л.Амгаланбаярын Монгол Улсын Ерөнхий сайд У.Хүрэлсүхэд бичсэн захидлын мөрөөр энэ сарын 10-нд Уул уурхай, хүнд үйлдвэрийн сайд Д.Сумъяабазарт болон АМГТГ-ын даргын үүргийг түр орлон гүйцэтгэгч Х.Хэрлэнд Засгийн Газрын Хэрэг Эрхлэх газраас уг асуудлыг шалган арга хэмжээ авч  хариу мэдэгдэх тухай  албан бичиг илгээсэн юм. Үүний дагуу салбарын сайд Д.Сумъяабазар энэ сарын 12-нд АМГТГ-ын даргын үүргийг түр орлон гүйцэтгэгч  Х.Хэрлэнд уг зөвшөөрлүүдийг цуцлах тухай албан бичгээр чиглэл өгсөн байна. Энэ албан бичиг АМГТГ-т очсоноос хойш 15 хонож байна. АМГТГ дарга Х.Хэрлэн салбарын сайдын чиглэлийг хэрхэн ажил болгож тусгай зөвшөөрлүүдийг цуцлахыг иргэд хүлээсээр байна. Ийнхүү Төв аймгийн Заамар сумын Төмөстий багийн иргэд, малчдын тэмцлийн үр дүнд долоон газар тухайлбал, Сэлэнгэ, Баянхонгор, Дорноговь  аймгийн малчид  уул уурхайн аюулаас холуур өнгөрөх бололтой. Эх сурвалж: “Зууны мэдээ” сонин