Т.САЙХАН УИХ-ын чуулганы хуралдаан эхэллээ. Үдээс өмнөх хуралдаанаар хоёр асуудал хэлэлцэнэ. Үүнд Засгийн газар, ХБНГУ-ын Засгийн газар хоорондын “Эрчим хүчний үр ашиг” хөтөлбөрийн санхүүгийн хамтын ажиллагааны тухай 2016-2017 оны хэлэлцээр, Монгол Улсын Засгийн газар, ХБНГУ-ын Франкфурт хот дахь Сэргээн босголтын зээлийн банк хоорондын Нэмэлт зээлийн болон төслийн 2 дахь гэрээг соёрхон батлах тухай хуулийн төсөл,  “Монгол Улсаас гадаадын зарим улстай дипломат харилцаа тогтоох тухай” Улсын Их Хурлын тогтоолын төсөл багтлаа. Ингээд хуралдаан эхлэхийн өмнө хэлэлцэх асуудалтай холбогдуулж гишүүд үг хэлэв. УИХ-ЫН ГИШҮҮН Н.УЧРАЛ: -Өмнөх долоо хоногт миний асуудлын хариуг сонсох байсан. Гэвч лхагва гаригт хэлэлцэх боломжгүй гэсэн албан бичиг өгсөн юм байна. Энэ албан бичигт асуулгын хариу гэхээс өөр агуулгатай зүйл бичсэн байна. Цаашид ийм алдаа гаргахгүй байхыг Засгийн газраас хүсч байна. УИХ-ЫН ГИШҮҮН Н.АМАРЗАЯА: -Ирэх долоо хоногийн чуулганы хурлаар хууль эрх зүйн орчны хүрээнд татвар, төлбөр тооцоо, лицензийн талаар сонсгол хийхийг хүссэн. Энэ сонсголыг ирэх долоо хоногт хийж өгөхийг хүсч байна. УИХ-ЫН ГИШҮҮН, ЗГХЭГ-ЫН ДАРГА Г.ЗАНДАНШАТАР: -Шатахууны нөөцтэй холбоотой асуудлаар УИХ-ын гишүүн Бямбацогт уржигдар хүсэлт гаргасан.  Өчигдөр Д.Оюунхорол, З.Нарантуяа, Г.Тэмүүлэн нараас ирсэн. Ингээд Сангийн яам, Монголбанкнаас мэдээллийг бүрэн авч нэгтгээд, өнөөдөр асуулгын хариуг өглөө. Өнөөдөр үдээс хойш асуулгын хариу сонсохоор болсон. Н.Учрал гишүүнд Цахим мөнгө, блокчэйн технологийн талаар төрөөс баримтлах бодлогын талаар хариу өгсөн. Гэхдээ энэ төрлийн санхүүгийн асуудал, зах зээлийн талаар Монголбанк, Санхүүгийн зохицуулах хороотой дахин ярилцах шаардлага гарсан учраас энэ удаа хойшлуулж өгөх хүсэлтийг Н.Учрал гишүүнд тавьсан. Эх сурвалж:www.polit.mn