Ц.БАЯР “Нутгийн шийдэл сан”-гийн  Жорлонгоо өөрчлөх багийнхан найм дах удаагийн сургалтаа Багануур дүүрэгт энэ сарын 24-нд хийлээ. Энэ удаагийн сургалтад хуримтлал үүсгэн өрхийн төсвөө хэрхэн үр ашигтай зарцуулах тухай Эдийн засагч Б.Ганхуяг танилцуулсан нь бусад сургалтаас онцлогтой болов. Сургалтад 50 гаруй иргэд оролцов. Тэд “ дарга нар энэ сургалтад оролцоогүй ч бид хуулиа хэрэгжүүлэхийг шаардаж жорлонгоо өөрчлөхийн төлөө тууштай ажиллана.Хуулийн дагуу жорлон өөрчлөх төсвийг төсөвт суулгаж, хариуцдаг мэргэжилтэнг шахаж ажиллана. Мөн Олон улсын болон өөрийн оронд туршсан шинэ технологийн талаар мэдлэгтэй боллоо. Энэ талаар бусад иргэддээ танилцуулна гэж байв. Тус дүүрэг хөрсний бохирдол харьцангүй багатай. Бохир соруулдаг машинтай боловч энэ жилээс нэг удаа соруулахад 82 мянган төгрөгийн төлбөр авдаг болсон нь иргэдийг бухимдуулж байгаа аж.  Нөгөө талаар цэвэрлэх байгууламж стандартын дагуу ажилдаггүй учраас дулааны улиралд эвгүй үнэр үнэртэж агаарыг бохирдуулдаг юм байна. Сургалтад иргэд багаар ажиллаж дүүргийнхээ давуу болон сул талыг ярилцаж технологийн шийдлээ тохирдог. Хөрс нь ус, намаг ихтэй учраас соруулдаг болон, үртэс рүү унгааж шахдаг био 00, мөн “тал нутгийн тансаг жорлон”-гийн технологийг сонгож жорлонгоо өөрчлөхөөр болов. Энэ тухай тэд “ Жорлонгоо өөрчилье” номноос дэлгэрүүлэн судлахаар болов.   Боловсон 00-д бие засдаг дарга нар жорлон өөрчлөх тухай ярихгүй л дээ Дүүргийн II хорооны иргэн Б.Наранхүү “ Гэртээ ч ажилдаа ч боловсон 00-д бие засдаг дарга нар, эрх мэдэл бүхий албан тушаалтанууд жорлон өөрчлөх тухай ярихгүй. Гэхдээ дүүргээрээ жорлонгоо өөрчлөхгүй бол хөрсний бохирдол арилахгүй, иргэд маань эрүүл аятай таатай нөхцөлд амьдарч чадахгүй юм гэдгийг мэддэг дарга байж магадгүй юм. Тэгэхээр төрөөс энэ асуудлыг хариуцдаг мэргэжилтэн тусгай багтай байснаар өөрчлөх боломжтой. Нэгэнт хууль нь байгаа учраас тэд ажлаа хийх ёстой. Нөгөө талаар хяналтгүйгээр өөрчлөлт хийгдэхгүй. Харин энэ сургалт бидэнд тэднийг шахаж ажлуулах хууль, стандарт байдаг гэдэг мэдээлэл өглөө. Баас, шээс гэж ярихаас цэрвэдэг хаалттай сэдвийг нээлттэй болгож олон улсад хэрхэн шийдсэн туршлага, жорлонгийн тухай олон сонирхолтой мэдлэг, мэдээллийг олгож байна. Өнөөдөр бид нян бактер үржсэн, хальсан, хөлдүүс болсон жорлонд орж бие засчихаад гэртээ орж байна. Аяндаа ахуй нөхцөл сайжирахаар хүмүүс зөв амьдралд шилждэг.   Өнгөрсөн зун бороо их орсоноос жорлон хальж баларсан   Тус дүүргийн III хорооны иргэн Ж.Баасанжав ярихдаа “ Өнгөрсөн зун бороо их орсоноос болж манай гудамжны ихэнх айлын жорлон халиад баларсан. Онцгой байдал дуудаж байж арга хэмжээ авсан болсон. Одоо ирэх зунаас өмнө жорлонгоо өөрчлөхгүй бол дээрх байдал дахихгүй гэх баталгаа алга. Харин энэ сургалт маш үр дүнтэй болж байна. Олон шинэ аргуудыг мэдэж авлаа. Ямар ч байсан хуучин жорлонгоо ариутгал хийн булах хэрэгтэйг мэдлээ. Мөн соруулдаг жорлонг олон айл хийвэл үнэ нь буурах боломжтой юм байна. Гудамжныхаа айлуудыг уриалах бодолтой байна. Манайх жорлонгоо анх 1982 онд барьж байсан юм байна. Түүнээс хойш нэг ч удаа ариутгал хийгээгүй. Хальж дүүрэх нь аргагүй л юм байна гэж байлаа. Багануур дүүргийнхэн уурхайгаа түшиглэн хуримтлал үүсгэн, хандив цуглуулж жорлонгоо өөрчлөхөөр шулуудсан. Эх сурвалж:www.polit.mn