Т.САЙХАН  НИТХ-ын дарга С.Амарсайханы санаачилсан  газрын тухай өргөдөл гомдол хүлээн авах сарын аяны хэлэлцүүлэг өнөөдөр /01.22/ СТӨ-нд боллоо.  Нийслэлийн олон мянган иргэдийн асуудал болсон газрын хэлэлцүүлэгт Хотын дарга С.Батболд ирсэнгүй.  Энэ нь НИТХ-ын дарга, Хотын дарга хоёрын үйл ажиллагаа үзэл бодол зөрдөгийг харуулж байна.  Мөн НИТХ-ын нэр бүхий төлөөлөгчид өнгөрөгч амралтын өдрүүдээр Нийслэлийн засаг дарга С.Батболдыг чөлөөлөх асуудлаар уулзалт зохион байгуулсан гэх яриа  байна.  Төлөөлөгчдийн 30 орчим хувь нь ирсэн бөгөөд ингэхдээ хотын  даргыг НИТХ дундаасаа сонгоно гэх мэдээлэл байна.Нийслэлийн засаг дарга С.Батболдын хувьд Нийслэлийн МАН-ын хорооны даргыг түр орлон гүйцэтгэж  байгаа.  Нийслэлийн намын хорооны тэргүүлэгчдийн хуралдаан хаана, хэрхэн, хэдэн хүний ирцтэй болсон нь тодорхойгүй ч гэнэт тогтоол  гарсан  гэх мэдээллийг гишүүд нь өгч буй юм.  Улмаар МАН-ын дүрмэнд аймаг, нийслэлийн намын хорооны даргыг үүрэг гүйцэтгэгч хэлбэрээр сонгож болох заалт ороогүй байдаг. Ирэх хоёрдугаар сард Нийслэлийн МАН-ын хорооноос даргаа шинэчлэн сонгох юм. Үүнээс өмнө С.Батболдыг хотын даргаас нь чөлөөлж, улмаар Нийслэлийн МАН-ын удирдлагыг өөрчлөх нь зүйтэй гэж нэр бүхий НИТХ-ын төлөөлөгчид үзсэн талаар шуугиж эхэллээ. Эх сурвалж:www.polit.mn