Т.САЙХАН Ерөнхий сайд У.Хүрэлсүхийн БНСУ-д хийсэн ажлын айлчлал өндөрлөж эх орондоо ирлээ.  Тэрээр айлчлалын эхний өдөр Ерөнхий сайд Ли Наг Ентэй ганцаарчлан уулзсаны дараа албан ёсны хэлэлцээ хийсэн. Мөн өдөр хоёр улсын Ерөнхий сайд харилцаа, хамтын ажиллагааны баримт бичигт гарын үсэг зурах ёслолд оролцлоо. Монгол Солонгосын бизнес форумд оролцож бизнес эрхлэгчидтэй зангиагүй уулзалт хийж хоёр улсын худалдаа, бизнесийг өргөжүүлэх боломжийн талаар ярилцлаа. Ерөнхий сайд У.Хүрэлсүх энэ үеэр “БНСУ-д хийсэн айлчлал зорилгодоо 100 хувь хүрлээ” гэж онцолсон байна.  Засгийн газрын үйл ажиллагааны хөтөлбөрт заасан “Багануурын үйлдвэр технологийн парк”, “Эмээлтийн хөнгөн үйлдвэрийн технологийн парк”, “Налайхын барилгын материал үйлдвэрлэлийн технологийн парк” зэрэг төслийг Солонгосын хөрөнгө оруулагчидтай хамтран хэрэгжүүлэх боломжтой гэдгийг Ерөнхий сайд хэллээ.  Мөн талууд “Эдийн засгийн хөгжлийн хамтын ажиллагааны сангаас 2017-2019 онд зээл авах тухай”, “Хөдөлмөр эрхлэлт, хөдөлмөрийн салбарт хамтран ажиллах тухай”, “Хөдөлмөр эрхлэх зөвшөөрөл олгох тогтолцооны дагуу ажилтан илгээх болон хүлээн авах тухай” хэлэлцээрт гарын үсэг зурлаа. БНСУ-ын Засгийн газраас авах 700 сая ам.доллартай тэнцэх воны хөнгөлөлттэй зээл 0,2 хувийн хүүтэй, эргэн төлөгдөх хугацаа 30 жил, үүнээс үндсэн төлбөрөөс чөлөөлөгдөх хугацаа 10 жил байх юм. Энэ зээлийг 2019 он дуустал хугацаанд авах бөгөөд агаар, орчны бохирдлыг арилгахад зарцуулахаар төлөвлөж байна. Солонгост  ажиллах хүчийг нэмэгдүүлнэ Жил ирэх бүр БНСУ-д ажиллаж, амьдрах иргэдийн тоо нэмэгдсээр өдгөө 45 мянгад хүрээд буй. Үүнээс хууль бусаар ажиллаж байгаа иргэдийн тоо 13 мянгад хүрчээ. Хууль бусаар ажиллаж, амьдарч буй иргэдийн тоо нэмэгдэхийн хэрээр хоёр орны хамтын харилцаанд сөргөөр нөлөөлөх багагүй асуудал үүсдэг гэдгийг ч албаныхан хэлдэг. Гэхдээ сүүлийн жилүүдэд хууль бусаар ажиллаж, амьдарч буй иргэдийн тоо харьцангуй буурсан үзүүлэлттэй гарсан байна. Тиймээс хууль ёсоор буюу гэрээтээр ажиллах хүчний тоог нэмэгдүүлэх нь нэг талдаа цаашид ч энэ тоог багасгах боломжит хувилбарын нэг гэж албаныхан үзэж байгаа. Иймээс Ерөнхий сайд энэ удаагийн айлчлалаараа уг асуудлыг хөндөж ярилцав. Солонгосын сайд Ким Ён Жүү “2017 онд Монгол Улсаас хөдөлмөрийн гэрээгээр ирсэн хүмүүс сайн ажилласан, мөн хууль бусаар хөдөлмөр эрхлэгчдийн тоо тодорхой хэмжээнд буурсан тул энэ жилийн квотыг өмнөхөөс нэмэх төлөвлөгөөтэй байна” хэмээн хэлсэн юм. Цаашид БНСУ-ын Засгийн газрын буцалтгүй тусламжийн хүрээнд ажлын байр нэмэгдүүлэх зорилгоор ажил олгогч, ажил хайгч нарын мэдээллийн систем байгуулах төслийг Монгол Улсад  хэрэгжүүлэх боломжтойг мөн уулзалтын үеэр хэлсэн байна. Эх сурвалж:www.polit.mn