М.БААСАНДЭЛГЭР “Хос дэнс” клубын тэргүүн А.Гантамир АТГ-т хандсан талаараа мэдээлэл хийлээ. Тэрээр 2017 оны арванхоёрдугаар сарын 21-ны өдөр АТГ-т УИХ-ын гишүүн О.Баасанхүүг авлига авсан байж болзошгүй гэж АТГ-т ханджээ. Гэвч өнөөдрийг хүртэл шалгалт хийж байгаа байцаагч тодорхойгүй, шалгалтын ажил хийж байна гэхээс өөр хариу өгөөгүй байна. Арванхоёрдугаар сарын 27-нд АТГ-ын байцаагч Цэдэн-Иш гэх хүн Нийслэлийн прокурорын газарт түүний гаргасан гомдлыг хянан шалгахаас татгалзсан хүсэлтийг гаргасан байжээ. Яагаад хэрэг шалгахаас татгалзсан талаараа ямар нэгэн мэдээлэл өгөөгүй байна. Тиймээс АТГ-ын дэргэдэх Олон нийтийн зөвлөлд өнөөдөр хандахаар болжээ. УИХ-ын гишүүн О.Баасанхүү Засгийн газрын хэрэг эрхлэх газрын дарга Г.Занданшатарт “УИХ-ын гишүүн миний бие 2017 оны арванхоёрдугаар сарын 9-10-ны өдрүүдэд Төрийн ордны их танхимд хууль тогтоомжийн хэлэлцүүлэг бүхий хурал зөвлөгөөн зохион байгуулах гэж байна” гэж, энэ үйл ажиллагааг зохион байгуулахад хэрэглэх 18.4 сая төгрөгийг Төр, Засгийн амралт үйлчилгээний дансанд энэ оны нэгдүгээр сарын дундуур хийх боломжтой гэсэн хүсэлт гаргажээ. Үүнийг “Хос дэнс” клубын тэргүүн А.Гантамир МАХН-ын хоёрдугаар их чуулган гэж нэрлэсэн хуралдаан хийх зөвшөөрөл авахдаа хууль тогтоомжийн хэлэлцүүлэг бүхий хурал зөвлөгөөн гэж хууран мэхлэх замаар авсан гэж үзжээ. УИХ-ын гишүүн О.Баасанхүү нь энэ хурлын санхүүжилтийг УИХ-ын гишүүн Д.Тэрбишдагва, Г.Шийлэгдамба, Ч.Дугаржав, С.Молор-Эрдэнэ, Ц.Шинэбаяр, У.Барсболд гэх хүмүүсээс тус бүрт нь таван сая төгрөгийн хандив авсан гэж мэдээлэл өгчээ. Гэсэн ч УИХ-ын гишүүн Д.Тэрбишдагва “Би 50 төгрөг ч өгөөгүй” гэж албан ёсоор мэдэгджээ. Энэ нь УИХ-ын гишүүн О.Баасанхүү нь бусдын нэрийг барьж өөрийнхөө хууль бус үйлдлийг хайцаалахын тулд худал мэдээлэл түгээж, нэр хүндэд нь халдаж байна гэсэн юм. Эх сурвалж: www.polit.mn