М.БААСАНДЭЛГЭР Шудрага өрсөлдөөн хэрэглэгчийн төлөө газраас өнгөрсөн онд хийсэн онцлох ажлуудаа танилцуулан мэдээлэл хийлээ. ШӨХТГ нь өнгөрсөн онд дөрвөн удаа хурал хийж, нийт 20 гаруй асуудлыг хэлэлцэж, 19 тогтоол гаргасан байна. Үүнд таван зүй ёсны монопол байдалтай аж ахуй нэгж эрхлэгч, 30 давамгай байдалтай аж ахуй нэгж эрхлэгч, хоёр үнэ тарифт өөрчлөлт оруулсан аж ахуй эрхлэгч нар багтжээ. Мөн хэрэглэгчийн эрхийг хамгаалах үнлэсний хөтөлбөрийг хэрэгжүүлэх удирдлага, зохион байгуулалтын ажлыг бүрэн хийжээ. ШӨХТГ-ын дарга Б.Лхагва “Монгол Улсын Засгийн газрын эдийн засгаа сэргээх, аж ахуйн нэгж байгууллагуудаа дэмжин ажиллах бодлогын хүрээнд Шударга Өрсөлдөөн, Хэрэглэгчийн төлөө газар 2017 онд аливаа зөрчлөөс урьдчилан сэргийлэх ажлыг шат дараатай зохион байгуулж ажилласан. Тухайлбал, өрсөлдөөний тухай хуулийн хүрээнд зам тээвэр, банк санхүү, нефть, газ импортлогч, төрийн болон орон нутгийн өмчөөр бараа ажил үйлчилгээ худалдан авагч нарт зориулсан салбаруудын уулзалтуудыг хийж, гарч буй зарим зөрчил дутагдлыг таниулан ойлгуулах, зөрчлөөс урьдчилан сэргийлэх зөвлөмжүүдийг өгч, эргэх холбоотой ажиллалав. Хэрэглэгчийн эрхийг хамгаалах тухай хуулийн хүрээнд томоохон аж ахуйн нэгж байгууллагуудын хэрэглэгчийн төвүүд, СӨХ-дын дээд зөвлөл, барьцаалан зээлдүүлэх үйл ажиллагаан дахь хэрэглэгчийн эрхийн асуудлаар холбогдох байгууллагуудыг хүлээн авч уулзан, тодорхой зөвлөмж чиглэлийг өгч, уялдаа холбоогоо хангаж ажиллалаа” гэсэн юм. ШӨХТГ нь 2018 оныг “Цахим худалдаан дахь хэрэглэгчийн эрхийг хамгаалах жил” болгон зарлажээ. Мөн тус агентлаг энэ онд “Эдийн засгийн хөгжлийг дэмжих өрсөлдөөний бодлого” сэдэвт үндэсний форум, “Хэрэглэгчийн эрхийг хамгаалах” үндэсний зөвлөгөөнийг хийхээр төлөвлөжээ. Эх сурвалж: www.polit.mn