Ч.ЗОТОЛ Швейцар Отгоо хэмээн 1990-ээд онд Монголдоо шуугиулаад зогсохгүй барууны орнуудаар “бадарчлан” ноён доллартай шадарлаж явсан эр сүүлийн жилүүдэд номын зах зээлд авхаалж, самбаагаа дайчлах болсон. Тэрээр “Сэтгэшгүй” С.Хүрэлбаатарын гурван ч  бүтээлийг Германы зах зээлд гаргаж, Ерөнхий сайд Н.Алтанхуягийн номыг гадагш нь борлуулаад байгаа. Тэгвэл саяхан “Supper dollar” хэмээх  номыг Монголд цөөн тоогоор хэвлүүлжээ. Сураг сонсвол мөн л баруун руу орчуулан  гаргахаар зэхэж буй гэнэ. Болсон явдлаас сэдэвлэсэн энэ ном Швейцар Отгоогийн өөрийнх нь бодит түүх байх  магадлалтайг зарим эх сурвалж хэлэв. Номд  Хойд Солонгос, Орос, Хятадад өрнөсөн үйл явдлыг өгүүлсэн нь нэг талдаа детектив зохиол шиг, нөгөө талаар түүгээр   Хойд Солонгос хуурамч доллар үйлдвэрлэдэг гэсэн батлагдаагүй мэдээллийг нотолсон нь тун сонирхолтой юм. Номыг О.Доржпалам, Ч.Чимэгбаатар нар бичсэн ч Швейцар Отгоо баруунд гаргахаар менежердэж байгаагаас үзвэл  өөрийнх нь бодит түүх ном болжээ гэсэн ойлголтыг  төрүүлж байна. Эх сурвалж: www.polit.mn