Х.ХАТАН Улс орон бүрт цаашлаад тив, дэлхийн хэмжээнд ч бяцхан охидын дунд миссийн, авьяасын, загварын гээд олон тэмцээн зохиогддог. Тэдний дундаас хамгийн нэр хүндтэй, олон улсад хүлээн зөвшөөрөгдсөн нь “Little Miss World”. Анх 2000 онд анх Украйнаас үүсэлтэйгээр зохиож эхэлсэн энэ тэмцээн жилээс жилд өргөжсөөр дэлхийн тэмцээн болсон түүхтэй. Харин 16 дахь жилдээ “Little Miss World” тэмцээн “re branding” буюу дахин нэрээ шинэчилж, өргөжүүлэн “Little Miss & Mister United World” болсон байна. Өмнө нь зөвхөн охид энэ тэмцээнд өрсөлддөг байсан бол хөвгүүдийг нэмж тэмцээн цар хүрээгээ өргөжүүлжээ. Харин манай улсын тухайд “Гүнжийн дэвтэр”-ийн санаачлагч, UBS телевизийн хөтлөгч Ч.Энхжаргал энэ наадамд оролцох эрхийг 2015 онд авч, олон улс шүүгчдийн бүрэлдэхүүнд сонгогдон ажиллаж иржээ. Тэрээр Монголдоо “Princess miss Mongolia” тэмцээнийг зохион байгуулж үндэсний ялагчаа тодруулдаг байна.  Өнгөрсөн гурван жилийн хугацаанд Монголын охид олон орны охидтой өрсөлдөн титмийн эзэд болж чамгүй амжилт үзүүлсээр байна. Жил бүр 60 гаруй орны охид Дэлхийн бяцхан миссийн тэмцээнд оролцдог. Харин энэ жил 73 хүүхэд өрсөлджээ. “Little Miss World” тэмцээн хамгийн олон жил тасралтгүй зохион байгуулагдаж байгаа, хамгийн хариуцлагатай, нэр хүндтэй, зэрэглэлээрээ нэгдүгээрт ордог, хүүхдийг зөвхөн хүүхдээр нь өрсөлдүүлдэг цорын ганц тэмцээн гэдгээрээ онцлогтой. Тэмцээний явцад хүүхдүүд нүүрээ буддаггүй, өндөр өсгийтэй гутал өмсдөггүй, үнэт эдлэл, гоёл чимэглэл зүүдэггүй, богино даашинз, банзал, богино өмд болон төрөл бүрийн загварын хувцас өмсөхийг зөвшөөрдөггүй. Хүүхдүүд өөрийн улсын далбаатай цагаан подволк, цагаан өмд, кэт өмсч өнгөрүүлдэг байна. Гол нь тэд зөвхөн өөрийгөө таниулах, авьяасаа үзүүлэх зорилготой. Өмсч зүүсэн эдэлж хэрэглэж байгаагаараа биш үзэл бодол, мэдлэг чадвараа сорьж, бие биеэсээ суралцах нь тэмцээний гол утга учир. Мөн олон орны хүүхдүүдтэй хамт байж, соёлын солилцоо хийнэ гэдэг хүүхдэд том ертөнцийг нээдэг гэж зохион байгуулагч, шүүгч Ч.Энхжаргал хэлж байв. Тэрээр “Хэдийгээр хүүхдийн тэмцээн боловч улс орнууд энэ тэмцээнд өндөр ач холбогдол өгч оролцдог. Учир нь улсаа сурталчилна, өв соёлоо гайхуулна, үндэсний онцлогоо харуулна, урлаг соёлоороо уралдах том өрсөлдөөн явагддаг. Тиймээс зохион байгуулалт сайтай, бэлтгэлтэй, өргөн бүрэлдэхүүнтэй ордог. Жишээлбэл, ОХУ жил бүр насны ангилал бүрт хүүхэд оролцуулдаг. Тэднийг дагаж явдаг багш нар, дэмжигчид, эцэг эхчүүд байдаг. Оросын амттан, идээ будаагаа оролцогсдын тоогоор авчирдаг. Найрамдлын баяр дээр оролцогчид улс үндэстнийхээ онцлогийг харуулсан идээ будаагаа сурталчилдаг учраас ийн ач холбогдол өгдөг. Мөн үндэсний болоод урлагийн хувцсан дээр нь анхаарч хувцас загвар зохион бүтээгчид нь маш мэдрэмжтэй урладаг юм билээ. Монголын хувьд ээж аавууд нь юм уу багш нь дагаж явдаг. Энэ жил охидын маань үндэсний хувцас үнэхээр гоё байж, гайхуулж чадсанд баяртай байгаа. Бортгон малгайтай Өүлэн эхийн хувцас, эхнэр дээлийг Монгол костюмс, Торго салоноор захиалж хийлгэсэн нь үр дүнгээ өгсөн. Энэ тэмцээний гол онцлог нь оролцогч бүр эх дэлхийдээ ямар ач холбогдолтой хүн болох вэ, юу хийж чадах вэ гэдгээ харуулах нийгмийн ажил болоод экологийн ажлын даалгавар юм. Даалгавраа хэрхэн хийснээ бичлэгээр хийж, хүүхдүүд хоёр минутын илтгэлийг англиар тавьдаг. Жаахан дэмжлэг тусламж байвал монгол охид дэлхийд авьяас чадвараараа гайхуулж чадна гэдэгт итгэлтай байна” гэсэн юм. Эх сурвалж: “Зууны мэдээ” сонин