С.САРУУЛ Маргааш буюу аравдугаар сарын 14-нд хуралдахаар товлосон Үндэсний чуулганаар хэлэлцэх асуудалтай холбогдуулан Ардчилсан нам, Ардчилсан залуучуудын холбооны гишүүдийн зүгээс шаардлага хүргүүлж буй талаараа хэвлэлийнхэнд хандлаа. Тэд Ардчилсан залуучуудын холбооны дүрмийг шинэчлэх төслийг боловсруулахаар АН-аас байгуулагдсан ажлын хэсгийг өөрчилж, тус ажлын хэсгийг 100 хувь АЗХ-ны гишүүдээс шинэчлэн бүрдүүлэх, АЗХ-ын долдугаар чуулганаар хэлэлцэхээр төлөвлөж байгаа АН-аас байгуулсан ажлын хэсгийн боловсруулсан дүрмийн төслийг шинэчлэн бүрдүүлэх ажлын хэсэгт буцааж, Улмаар АЗХ-ын ээлжит зургадугаар чуулганы тогтоолын дагуу 21 аймаг, есөн дүүрэгт бүртгэлтэй нийт 42000 гишүүн залуучуудын саналыг тусгаж анхан шатаар хэлэлцүүлэх шаардлагыг хүргүүлж байгаа аж. Энэ талаар АЗХ-ны гишүүн О.Цэлмэг “2000 онд ардчиллын төлөөх таван нам нийлж АН-ыг байгуулах үед тус намуудын дэргэдэх залуучуудын байгууллагууд ч мөн адил нэгдэж одоогийн АЗХ-г байгуулснаас хойш 17 жил болж байна. АН улс орон даяар явагдах нүсэр сунгаагаар даргаа тодруулахыг манай холбоонд тулгаж, залуучуудын байгууллагын үндсэн дүрэмд өөрчлөлт хийх замаар гүйцэлдүүлэх гэж байгааг эсэргүүцэж байна. АН-ын даргыг нийт гишүүдээс тодруулахад нэр дэвшигчдээс маш их санхүүгийн зардал гарсан. Ийм маягаар манай байгууллагын удирдлагыг сонгох юм бол мөнгө санхүүгийн хүлээсэнд баригдаж зорилгоосоо хазайхад хүрнэ. АН-ын удирдлагууд АЗХ-ын дотоод асуудалт хэт их оролцож байна” гэв. Эх сурвалж: www.polit.mn