Ч.ГАНТУЛГА УДБЭТ-ын уран бүтээлчид 55 дахь удаагийн үзвэрээ нээхэд бэлэн болжээ. Тэд энэ удаад дэлхийн алдарт “Аида” дуурийг энэ сарын 7, 8-нд  “Хунт нуур” бүжгэн жүжгийг 14, 15-нд тоглосноор үзэгчидтэйгээ мэндчилэх юм. “Аида” дуурийн хувьд дэлхийд чансаагаараа дээгүүрт бичигдэж, дуучнаас их хөдөлмөр, хоолойн чадал шаарддаг том бүтээл юм. Энэ дуурийг манай театрын тайзнаа 2010 онд Оросын алдарт удирдаач, найруулагч А.П.Чепурной анх найруулан тавьсан. Тэгвэл долоон жилийн дараа дахин удирдах ажээ. Этиопийн гүнж Аидад гавьяат жүжигчин Б.Эрдэнэтуяа дуулах бол Египетийн гүнж Амнерист гоцлол дуучин, Соёлын тэр­гүүний ажилтан Р.Доржхорлоо дуулах юм байна. Харин эдгээр гүнжийн дурлалт залуу Египетийн цэргийн жанжинд гоц­лол дуучин, соёлын тэр­гүүний ажилтан Ч.Түмэндэмбэрэл дуулах аж. Гавьяат жүжигчин, дуучин Б.Эрдэнэтуяа “Аидаг өмнө нь хоёр өдөр нэг баг дуулж байсан түүх байхгүй. Энэ удаад манай баг эхний хоёр өдөр дараалан дуулах хуваарьтай байгаа. Мөн алдарт найруулагчийн тавьсан бүтээлийг долоон жилийн хугацаанд хэрхэн авч явснаа удирдаачдаа шалгуулах хариуцлагатай мөч ирээд байна” гэв. Харин “Хунт нуур” балет илүү шинэлэг баг бүрдүүлснээрээ онцлог юм байна. Дуурийн театр энэ жил 13 шинэ бүжигчинтэй болжээ. Залуусын эрч хүчийг тус балетаас мэдрээрэй гэж Одетта, Оделлияд бүжиглэх залуу бүжигчин О.Анужин онцолсон юм. Үүнээс гадна 2018 онд театрын уран бүтээлчид 55 жилийн ойгоо угтана. Ойн хүрээнд ОХУ, Герман, Япон, Болгар, Итали, БНСУ-ын шилдэг уран бүтээлчидтэй хамтарсан тоглолт хийхээр бэлдэж байгаа аж. Эх сурвалж: “Зууны мэдээ” сонин