Р.ОЮУН “Хаппи Веритас” төвөөс элэгний С вирусын эмийг курсээр нь үнэгүй олгох болсон талаар өчигдөр мэдээлэл хийлээ. Энэ үеэр Маркетинг менежер Н.Мөнх-Эрдэнэ хэлэхдээ “Манайх үйлчлүүлэгчдийнхээ хүсэл шаардлагаар аян өрнүүлдэг. Энэ удаа элэгний С, В вирусын эмчилгээг гурван сараар нь үнэгүй олгож байгаагаа зарлаж байна. Мөн элэгний В вирусын эмчилгээний эхний гурван сарыг үнэгүй болгож байгаа. Эхэлж ирсэн 500 хүнд үнэ төлбөргүй эмчилгээ хийнэ. Манайх мөн В вирусын дархлааны вакциныг хийж эхэлж байгаагаа дуулгахад таатай байна” гэсэн юм. Харин тус төвийн зөвлөх, гавьяат эмч Н.Чойжамц “Элэгний С вирусыг эмчлэх эмийн бүртгэлийг Монгол Улсын эмийн бүртгэлд бүртгээд 2015 оны арванхоёрдугаар сараас эхэлж С вирусын эм Монголд орж ирсэн. С вирусыг эмчлэх таван эм байгаа. Бүгд найрлага, орц, үр дүн нь адилхан. 95-аас дээш хувь нь үр дүнтэй эмүүд орж ирсэн, үр дүн сайтай. Одоогоор Монгол Улсын хэмжээнд 20 гаруй мянган хүн С вирусын эм ууж эдгэрээд байна” гэв. Тус төв С вирусыг эмчлэх эхний гурван сарын эмийг Эрүүл мэндийн даатгалаар үнэгүй олгох урамшуулал зарлаж байна. Мөн В вирустай хүмүүсийн эмчилгээнд зориулж эхний гурван сарын тенофовер эмийг үнэгүй олгоно. Мөн В вирусын вакциныг төв салбар дээрээ хийж эхэлсэн гэв. Энэ вакциныг гурван тун тарьдаг бөгөөд нэг сарын зайтай хоёр дахь нь, таван сарын зайтай гурав дахь тунг нь тарьснаар 15 жилийн дархлаа тогтдог. В-гийн вакцин хийлгэснээр В, Д-гийн халдвар авахгүй юм байна. Хяналтын шинжилгээ нь бүрдсэн хүмүүст эм­чилгээгээ үнэ төлбөргүй хүргэх аж. 2015 оны Эрүүл мэндийн сайдын 186 дугаар тушаалаар С вирусын эмчилгээнд орох хүмүүсийн 11 төрлийн шинжилгээ байдаг ажээ. Энэ шинжилгээг “Хаппи Веритас” оношилгооны төвд хийж байна. Эмчилгээнд орохын тулд энэ шинжилгээнд хамрагдаж болох аж. Мөн В вирусын эмчилгээнд орохын тулд дээрх нэр төрлийн шинжилгээг өгч байж эмчилгээнд орох, үгүйгээ шийдэх аж. Эх сурвалж: “Зууны мэдээ” сонин