Д.НАДМИД

Монголын бодибилдинг фитнессийн улсын аварга шалгаруулах 26 дахь удаагийн “Монголын мистер-2017” тэмцээн болж өндөрлөлөө. Хоёр өдөр үргэлжилсэн энэ тэмцээнд 39 байгууллагын 100 гаруй тамирчин 19 ангилалд ур чадвар, бие бялдрын гоо сайхнаар өрсөлдсөн юм. Эхний өдөр нь залуучууд, мастер болон эрэгтэй, эмэгтэй фитнесс ангиллын тэмцээнүүд болов. Бодибилдинг фитнессийн тэмцээн гэхээр уг спортыг сонирхогч нэгэн хэсгийнхэн бие бялдрын гоо сайхан, булчин шөрмөсний давуугаараа өрсөлддөг гэсэн ойлголт байдаг байлаа. Тэгвэл энэ төрөл жилээс жилд спорт урлагийг хослуулсан шинж чанартайгаар хөгжиж байгааг энэ удаагийн тэмцээнээс харлаа.

Зөвхөн фитнесс ангилалд гэж үзвэл тамирчид спортоос гадна хүч, тэнцвэр, бүжгийн урлагийн сайхныг харуулан өрсөлдөж байна. Циркийн үзүүлбэр үзэж байгаа юм шиг санагдуулах үе ч байх юм. Харин бодибилдинг гэдэг талаасаа бол тамирчин хүний биеийн болон булчингийн хөгжил нь хэр өв тэгш хөгжсөн байна гэдгийг онцолдог аж. Монгол Улсад шинэлэгдүү гэгддэг ч манай тамирчдын хүрээ жилээс жилд тэлж тив, дэлхийн тэцмээний олон арван медальтан төрөөд байгаагийн дотор дэлхийн болоод Азийн аварга цолтон ч бий болов. Энэ удаагийн тэмцээнд оролцогч багуудын дотроос “Улаанбаатар фитнесс”, “Чийрэг Монгол”, “Тайхар”, “Олимпс Жем”, “Гольден жем”, “Алдар” спорт хорооны тамирчид медалийн тавцанд олон зогсож байгаа нь харагдаж байв. Сонины дугаар шилжих мөчид “Монголын Мистер” тодроогүй байлаа.

Эх сурвалж: "Зууны мэдээ" сонин