Т.САЙХАН

Нам бус иргэдийн нэгдсэн холбоо, Ард түмний онц түр зөвлөлийн гишүүд хамтран өнөөдөр /09.12/ мэдээлэл хийлээ. Оффшор бүсэд данстай улстөрчдөд хандан Ерөнхийлөгч Х.Баттулга өнгөрсөн долдугаар сард уриалга гаргасан. 49 хоногт багтаан оффшор дансанд байгаа мөнгөө Монголын банкууд руу эргүүлэн татахыг уриалсан байдаг. Хэрэв татахгүй бол хариуцлага хүлээлгэхээ мэдэгдсэн билээ. Тэгвэл Ерөнхийлөгчийн өгсөн 49 хоногийн хугацаа дуусгавар болж байна. Энэ хугацаанд Монголын ард түмэн хэн нь оффшор дахь мөнгөө эх оронруугаа татаж, Ерөнхийлөгчийн уриалгыг дагах вэ гэдгийг чих тавин хүлээж байсан. Гэтэл энэ хугацаанд нэг ч хүн оффшор бүс дэх хөрөнгөө татаагүй байна. Тиймээс Монголын нам бус иргэдийн нэгдсэн холбоо, Ард түмний онц түр зөвлөлийн гишүүд хамтран эсэргүүцлийн жагсаал зохион байгуулахаар болсон байна. Тэд зөвхөн оффшорын асуудлыг тавихгүй, 60 тэрбумын хэргийг хаасан болон Үндсэн хуулийн өөрчлөлтийг эсэргүүцэн жагсах юм. Монголын нам бус иргэдийн нэгдсэн холбооны тэргүүн Эрдэнэбаяр “Маш олон гэрч, нотлох баримттай 60 тэрбумын бичлэгийг хааж, Монголын хуулийн байгууллага ард түмнийг доромжиллоо. Ж.Амарбаясгалан, Ц.Нямдорж, Ц.Сандуй, А.Ганбаатар нар энэ хэргийг болсон гэдгийг нотолсон шүү дээ. Тэгсэн атал хэргийг ямар нэгэн тохироо хийж хаалаа. Үүнийг эсэргүүцэн хүлээн авч байгаа олон хүн бий. Тэднийг манай жагсаалд нэгдээсэй гэж хүсч байна. Сая Засгийн газрыг унагасан явдлыг бидний зүгээс зөв зүйтэй гэж үзэж байна. Одоо УИХ-ыг тараах ёстой. Монголын төрд гарсан хүмүүс ийм увайгүй байж болохгүй ” гэв. Тэдний эсэргүүцлийн жагсаал энэ сарын 23-нд Сүхбаатарын талбайд болох юм байна. 

Эх сурвалж:www.polit.mn