Л.ХЭРЛЭН

Шүүхийн шинжилгээний үндэсний хүрээлэнгийн шарил хадгалах газар 48 настай талийгаач Б-ийн  цогцсыг сольсон хэрэг  өнгөрсөн долоо хоногт гарсан юм.  Талийгаачийнхаа шарилыг тэнд хадгалуулсан иргэд  ажил явдлыг нь өнгөрүүлэхийн өмнөх бэлтгэл ажлыг хангахаар  өнгөрсөн баасан гаригийн шөнө  очтол олдоогүй.  Тус  газарт 60 гаруй хүний шарил хадгалагдаж байгаа   дотор хайж үзэхэд  байхгүй, жижүүрийн эмч нар тодорхой хариу хэлж чадахгүй багагүй бухимдал үүсгэсэн. Ингээд өнгөрсөн долоо хоногийн  лхагва гаригт  Баянхонгор аймгийн Заг сум руу нэг шарил явуулсан, тэр байж магадгүй гэсэн таамаг гаргаж эрэл сурал болоход “Заг сум нь аймгаасаа алсдагдсан захын сум. Байдрагийн гол үертэй тул шарилыг буцаахад асуудалтай” гэсэн хариу ирж   иргэдийг  нэлээд хэд хоног чирэгдүүлсэн. Энэ  бүхний эцэст асуудлыг шийдэж,  иргэдийг хохиролгүй болгосон гэх  ганц өгүүлбэрээр Шүүх эмнэлэг хэвлэлийнхний  амыг таглаж,  хариуцлага алдсан хүмүүс нь хөшигний ард үлдэж байна. Ганц  энэ ч биш, ер нь шарил хадгалах газруудад ийм зүйл байсхийгээд  гардаг. Шарил хадгалах стандартыг хангасан  газар ч манайд байхгүй шахам. Зориулалтын хөргөгч цөөхөн байдгаас ачааллаа дийлдэггүй. Шарилыг модон бандан дээр давхарлаж хураах тохиолдол ч гардаг гэдгийг зарим эх сурвалж хэлж байна. Холбогдох газрууд, харъяа эмнэлгүүд  энэ байдалд анхаарч, шийдвэрлэхгүй бол өөд болоочдоо хүндэтгэл үзүүлэхэд бид хэдий болтол учир дутагдалтай хандсаар байх вэ.

Эх сурвалж: www.polit.mn