Ц.БАЯР

ЮНЕСКО-гоос Монгол улс, ОХУ-ын “Дагуурын ландшафт”-д буюу хилийн дагуух газар нутгийг  Дэлхийн байгалийн өвд бүртгэн авсан шийдвэрийг гаргасан билээ. Ингэснээр Дагуурын тал нутаг дахь ой, ойт хээр, хээр, ус намгархаг газрын экосистем, 236 зүйлийн шувууд түүний дотор тэнд өндөглөн зусдаг нүүдлийн шувууд, цэн тогоруу, өвөгт тогоруу, хархираа тогоруу, мөн хил дамжин нүүдэлдэг цагаан зээр, мануул,тарвага зэрэг 34 зүйлийн хөхтөн амьтан, 236 зүйлийн дээд ургамал түүний дотор унаган болон ховор ургамлыг багтаадаг иж бүрэн экосистемийг хамгаалах юм. Түүнчлэн хамгаалалтын менежмент нь олон улсын анхаарлын төвд орж, зарим төсөл, хөтөлбөрт хамрагдах боломж дээшлэх ач холбогдолтой. Мөн хоёр улсын Засгийн газарт дэлхийн өвийг хамгаалах, менежментийг сайжруулахад чиглэсэн арга хэмжээ авах, санхүүжилтийг нэмэгдүүлэх зэрэг илүү үүрэг хариуцлагыг хүлээлгэж байгаа юм. Дэлхийн өвийн хороо Монгол Улсын Засгийн газарт Дэлхийн өвд бүртгэгдсэн энэ газар нутгийн хилийн дотор уул уурхайн хайгуул, олборлолт явуулахгүй байхад анхаарлаа хандуулахыг зөвлөсөн байна.

Эх сурвалж:www.polit.mn