А.БЯМБАМАА

Он гарсаар улсын хэмжээнд ная гаруй удаагийн ой хээрийн түймэр гараад байна. Сэлэнгэ, Төв, Хөвсгөл, Булган зэрэг аймгуудад ой хээрийн түймэр гарч мэргэжлийн албан хаагчид ажиллаж байна. Ой хээрийн түймэртэй тэмцэж байгаа ажилчдад зориулан хувь хүмүүс, байгууллага аж ахуйн нэгжүүд хандивын аян өрнүүлэх ажлыг зохион байгуулж байна.

Эрдэнэт үйлдвэр ч нийгмийн хариуцлагынхаа хүрээнд тусламж дэмжлэгийн үйл ажиллагаанд манлайлан оролцдог уламжлалаараа гар сэтгэл нийлэн оролцож байна.  Уурхайчид, баяжуулагчдын сэтгэл шингэсэн эд материалын тусламж үзүүлэх аянг Эрдэнэт үйлдвэрийн Хөдөлмөрийн аюулгүй байдал эрүүл ахуй, байгал орчныг хамгаалах хэлтсээс зохион байгуулж эхэллээ. Сэлэнгэ аймгийн Ерөө сумын нутагт гарсан ой хээрийн түймэртэй тэмцэж байгаа албан хаагчдад гагнуурчдын брезентэн хослол, ажлын хувцас, галд тэсвэртэй гутал зэргийнэд материалын тусламж үзүүллээ. Түүнчлэн идэвхжүүлсэн нүүрсэн шүүртэй амны хаалт, галд тэсвэртэй илгэн алгатай бээлий, цэвэр ус, канистр сав зэрэг түймэрт ажиллаж байгаа хүмүүст хэрэгцээт зүйлсээр туслалаа. Хэдхэн хоногийн өмнө болсон хүчтэй бороо, аянганы улмаас өндөр хүчдэлүүд унаж цөөнгүй аймгууд тоггүй болж, Орхон аймгийн зарим айл өрхүүд орон гэргүй болоход ч Эрдэнэт үйлдвэрийн хамт олон чин сэтгэлийн тусламж үзүүлэх аяныг өрнүүлсэн юм. Энэ нь баялгийг бүтээгч Эрдэнэт үйлдвэрийн хамт олны нийгмийн хариуцлагын өмнө хүлээсэн үүргээ биелүүлж байгаагийн нэгээхэн хэсэг нь юм.

Эх сурвалж: www.polit.mn