Б.ТУУЛ

Эрдмийн зэрэг хамгаалсан залуу докторуудын цаашдын судалгааны ажлыг чанаржуулах, тэднийг богино хугацаанд дадлагажуулахад чиглэсэн туршилт, зохион бүтээх үйл ажиллагааг  дэмжих зорилгоор 2010 оноос эхлэн докторын дараах судалгаанд БСШУС-ын  сайдын нэрэмжит инновацийн тэтгэлгийг олгож эхэлсэн билээ. Одоогоор энэхүү тэтгэлгийг 66 залуу доктор хүртээд байна.  Докторын дараах судалгааны тэтгэлэг нь залуу эрдэмтдийн цаашдын судалгааны ажлын шинэ санааг дэмжих, инновацид чиглэсэн бүтээл, үйлчилгээг бий болгох, оюуны өмчийн хамгаалалт хийх, олон улсын судалгааны түвшинд хүрэх зэрэгт урам өгөх санхүүгийн дэмжлэг болох  зориулалттай юм. Боловсрол, соёл, шинжлэх ухаан, спортын сайдын 2011 оны 222 дугаар тушаалаар батлагдсан “Докторын дараах судалгаанд сайдын нэрэмжит инновацийн тэтгэлэг олгох журам”-ын дагуу энэ удаа тэтгэлэгт ирүүлсэн төслүүдийг сонгон шалгаруулсан юм. Энэ жилийн тэтгэлэгт 45 төсөл ирснээс журмын дагуу сонгон шалгаруулалт хийж эрдэм шинжилгээ, судалгааны ажлын үр дүнг үйлдвэрлэл, үйлчилгээнд нэвтрүүлж, инновацийн шинэ бүтээгдэхүүн, үйлчилгээг бий болгох 10 төслийг шалгаруулсан байна. Тэтгэлэгт хамрагдахаар шалгарсан 10 залуу докторт баяр наадмын өмнөхөн  тус бүр 10 сая төгрөгийн тэтгэлэг олгосон юм.

Эх сурвалж: “Зууны мэдээ” сонин