Т.ДАЛАЙ

Монголын үндэсний бөхийн холбооны цэцдийн зөвлөлөөс ээлжит бус “Их эе” хурлыг зохион байгуулж, МҮБХ-ны тэргүүнээр “Гачуурт” компанийн ерөнхий захирал Л.Чинбатыг томилсон шийдвэр гаргаад байсан. Гэсэн ч МҮБХ-ны тэргүүн Р.Нямдорж одоог хүртэл ажлаа хүлээлгэн өгөөгүй байгаа. Харин өчигдөр /07.17/ Монгол бөхийн өргөөнд бөхчүүдийн хооронд болон МҮБХ-ны удирдлагуудын хооронд маргаан дэгджээ. Орой 18.00 цагийн үед Р.Нямдорж даргатай ажлаа хүлээлцэхээр Монгол бөхийн өргөөнд очжээ. Гэтэл Говь-Алтай аймгийн 40 орчим бөх хүч түрэн орж ирээд явахыг шаардсан байна. Тэдний гарт цахилгаан бороохой байсан гэнэ. Энэ талаар МҮБХ-ны хяналтын зөвлөлийн гишүүн Ц.Ариунболд “ Бидний зорилго тэдэнтэй маргалдах биш байсан учраас бид өргөөнөөс гарах гэтэл хаалга цоожтой байсан. Тэгтэл Улсын гарьд Н.Ганбаатар өшиглөөд онгойлгочихсон. Говь-Алтай аймгийн бөхчүүд сайн зохион байгуулалттайгаар Р.Нямдоржийг аврахыг боддог юм байна. Бусад аймгийн бөхчүүд тухайлбал манай Өвөрхангай аймгийн бөхчүүд ахыгаа, аавыгаа аврахаар улсын арслангаас, сумын заан хүртэл нэгдээд ирэхгүй. Говь-Алтай аймгийн бөхчүүд сайхан нэгддэг юм байна. Гэхдээ цаана нь 20 аймаг бий шүү. Р.Нямдорж Увсынхан бөх биш гэх юм ярьдаг. Увсынхан нэг юм тунгаана биз. Тэмцэл хийх талаар ярьж л байна лээ. МҮБХ-ны тэргүүний асуудлыг нэг тийш нь шийдэхгүй асуудал даамжирвал бөхчүүд хоорондоо хагаралдаж, долоодугаар сарын 1-ний дайтай үймээн ч дэгдэж магадгүй байна” хэмээв. МҮБХ-ны тэргүүн Р.Нямдорж ажлаа өгөхгүй байгаа энэхүү асуудлыг Ерөнхийлөгч анхааралдаа авах шаардлагатай гэдгийг мөн хэллээ.

Эх сурвалж:www.polit.mn