Т.САЙХАН

Улсын хэмжээнд хэт халалт, хуурайшилт их байгаас ой, хээрийн түймэр гарсаар байна. Цагдаагийн байгууллага долдугаар сарын 16-ны байдлаар дөрвөн хэрэгт эрүүгийн хэрэг үүсгэсэн шалгаж, 68 захиргааны хариуцлагын тухай болон Зөрчлийн тухай хуульд зааснаар харицлага тооцсон байна. Мөн одоогийн байдлаар Булган ес, Дорнод дөрөв, Сүхбаатар нэг, Сэлэнгэ 10, Төв зургаа, Хэнтий нэг, Нийслэлийн цагдаагийн газарт хоёр нийт 33 гомдол, мэдээлэл шалгаж байна.
Энэ төрлийн гэмт хэргийг урьд оны мөн үетэй харьцуулахад 45.8 хувь буюу 33 нэгжээр өсч, цагдаагийн байгууллагаас 71 түймрийн эзэн холбогдогчийг тогтоож 36.7 сая төгрөгийн хохирлыг гэмт буруутай этгээдээр нөхөн төлүүлсэн. Эрүүгийн хуулийн 24.7 дугаар зүйлд гал, шатамхай зүйлтэй болгоомжгүй харьцсаны улмаас ой, хээрийн түймэр гарч хүний бие махбодид хүнд хохирол учирсан, хүний амь нас хохирсон, байгаль орчинд их хэмжээний хохирол учирсан бол нэг жилээс таван жил хүртэл хугацаагаар хорих ял шийтгэнэ гэжээ. Мөн Зөрчлийн тухай хуулийн 5.15 дугаар зүйлд галын аюулгүй байдлыг хангах талаар тавигдах нийтлэг шаардлагыг зөрчсөн бол учруулсан хохирол, нөхөн төлбөрийг гаргуулж хүнийг тавин нэгжтэй тэнцэх хэмжээний төгрөгөөр, хуулийн этгээдийг таван зуун нэгжтэй тэнцэх хэмжээний төгрөгөөр торгоно гэж заажээ. Тиймээс иргэд хуурайшилт ихтэй газар ил гал гаргахгүй байх, татсан тамхиа бүрэн унтрааж байх, тээврийн хэрэгслийн бүрэн бүтэн байдлыг хангаж гал түймэрийн аюулаас урьдчилан сэргийлэхийг холбогдох байгууллагууд анхааруулж байна.

Эх сурвалж:www.polit.mn