Б.Туул

Үндэсний их баяр наадмын өдрүүдэд Цагдаагийн ерөнхий газраас иргэдийн аюулгүй байдлыг ханган өндөржүүлсэн бэлэн байдалд ажиллаж байгаа билээ. Баярын наадмын үеэр бага насны хүүхэд төөрөх, эд зүйлээ хулгайд алдах дуудлага их ирдэг бөгөөд цагдаагийн байгууллага газар дээр нь шуурхай арга хэмжээ авч ажиллаж байна. Энэ жил Хүй долоо худагт нийт 3800 орчим албан хаагч үүрэг гүйцэтгэж, гэмт хэргээс урьдчилан сэргийлэх, хэв журам сахиулах, гэмт хэргийг газар дээр нь түргэн шуурхай арга хэмжээ авч ажиллаж байна. Долдугаар сарын 10-аас буюу наадам эхэлснээс Хүй долоо худагт гэмт хэргийн шинжтэй 12 үйлдэл бүртгэгдсэн байна. Үүний наймыг шийдвэрлэж, дөрвийг нь мөрдөн байцаалтын явцад шалгаж байгаа ажээ. Мөн бага насны хүүхэд төөрсөн дуудлага долдугаар сарын 11-ны өдөр тав ирсэн бол долдугаар сарын 12-ны өдөр долоо хүүхэд асран хамгаалагчаасаа төөрснийг эцэг эхэд нь хүлээлгэн өгсөн байна. Түүнчлэн 1-8 12 хүүхэд асран хамгаалагчаасаа төөрсөн байсныг цагдаагийн байгууллага болон хүүхэд хамгааллын төвийн тусламжтайгаар эцэг эхэд нь хүлээлгэн өгчээ. Тиймээс иргэд бага насны хүүхдээ авч явахдаа анхаарал болгоомжтой байхыг анхааруулж байна. Мөн “Баяр наадмын амралт урт хугацаанд үргэлжилж байгаа учраас иргэд амарч, зугаалахдаа архи, согтууруулах ундаа хэрэглэхгүй байх, хэрэглэсэн үедээ тохируулан хэрэглэх, гол ус ихтэй газар анхаарал болгоомжтой байхад анхаарах шаардлагатай байна. Мөн орон нутгийн замын ачаалал нэмэгдэж байгаа учраас хөдөлгөөнд оролцохдоо хурдаа тохируулан соёлтой оролцохыг анхааруулж байна” гэв.

Эх сурвалж: www.polit.mn