Т.САЙХАН

Жил бүрийн наадмын нээлт өвөрмөц онцлогтой болдог.  Монгол түмэн ч наадмын нээлтээ тэсэн ядан хүлээж,омогшин үздэг билээ. Нээлт ямар болов, хэн дуулж, ямар утга агуулгатай хөгжим эгшиглэв гээд л үзэж чадаагүй нэг нь сонирхон асуух нь олон. Тэгвэл энэ жилийн наадмын нээлт өвөрмөц онцлогтой, монгол хүн гэдгээрээ бахархан омогших өрнөл,оргил хэсэг олонтой болж чадлаа. Төрийн соёрхолт,найруулагч Н.Наранбаатар ч өөрийгөө дахин нээж харууллаа. Энэ жилийн баяр наадам түүний гурав дахь наадмын нээлт билээ. Тэр Монголынхоо үүхийг яаж наадамчин олны зүрх сэтгэлд хүргэж тэнд аугаа түүхтэй монгол хүн гэдгийг нь мэдрүүлэх вэ гэдгийг сайхан мэддэг болжээ. Нээлт цаг 30 минут үргэлжилсэн нь жаахан урт мэт байсан ч  бүтэн цагийн турш эх орныхоо үүх түүхээр аялуулж чадсан нь үнэхээр гайхалтай. Ер нь энэ жилийн наадам Монголчуудын хувьд ихэд онцлог болж байна. Шинэ Ерөнхийлөгч маань  Монгол наадмын дэвжээнээ ард түмэнтэйгээ мэндчилж наадмаа нээлээ. Монгол Улсын тав дахь Ерөнхийлөгч Х.Баттулга “Монголын сайн нэрийг өндөрт өргөж яваа хүн бүрийн халуун сэтгэл, хөдөлмөр зүтгэл өөрсдөө өөрсдөдөө эзэн байх их ухаан дээр эх орон минь өөдлөн дэвжиж явна. Тусгаар тогтнол минь бат, туг сүлд минь цэх байна. Хөдөлмөрч, хичээнгүй Монгол ялж, хөгжил дэвшлийн их замд тэмүүлж байна” гэсэн юм.  Цэнхэр тэрлэгээр гоёсон Ерөнхийлөгч даруухан харагдаж байв. Тэр яах аргагүй энэ жилийн наадмын нэгэн гол өнгө төрх нь байв. Дараагийн нэг онцлох зүйл нь яах аргагүй хөгжмийн найруулга байв. Энэ жилийн наадмын нээлтийн хөгжмийг продюссер Б.Чинбат бичжээ. Тэрээр хэдэн сар гаруйн хугацаанд нээлтийн бүтээл дээр ажиллаж наадмын өмнөхөн дуусгажээ. Тэгэхээр нээлтэд ирсэн түмэн түүний томоохон бүтээлийн анхны сонсогч боллоо.  Бас л залуу хөгжмийн зохиолчийн бүтээл нээлтийн түүх үйл явдлуудтай хослон эгшиглэх нь содон байлаа.Энэ жилийн наадмын нээлтээр Хүннү гүрнээс хойш 1990 оны ардчилсан хувсгал хүртэлх монголын түүхийн үечлэлийг уран аргаар харуулсан гэж болно.
 Чингис хаан морилон ирсэн, хувьсгалын анхны долоо наадамчин олонтой мэндчилсэн, 1990 оны цагаан морин жилийг санагдуулдаг алдарт “хонхны дуу” ч эгшиглэсэн.  Гавьяат жүжигчин дуучин Г.Ариунбаатар наадмын нээлтийг чимж, гавьяат жүжигчин Т.Ариунаа, Х.Лхагвасүрэн нар уламжлал ёсоороо нээлтэд ая дуугаа өргөсөн. Үзэж харах зүйлээр дүүрэн өмнөх жилүүдийнхээсээ улам л сайхан наадмын нээлт болов. Монгол наадмын нээлт юм чинь ийм байхаас ч өөр яах билээ. Нээлтийг удирдсан Ерөнхий найруулагч Төрийн соёрхолт Н.Наранбаатар, ерөнхий менежерээр Ардын жүжигчин П.Цэрэндагва нарын багт баяр хүргэе.

Эх сурвалж:www.polit.mn