С.САРУУЛ

Монголын Тулгар төрийн 2226 жил, Их Монгол Улсын 811 жил, Үндэсний эрх чөлөө, тусгаар тогтнолоо сэргээн мандуулсны 106 жил, Ардын хувьсгалын 96 жил, Ардчилсан хувьсгалын 27 жилийн ой энэ жил тохиож байна. Энэ жилийн болон өнгөрсөн жилийн Үндэсний их баяр наадмын нээлтийн ажиллагааг Төрийн соёрхолт найруулагч Н.Наранбаатар найруулаад байгаа юм. Монголын түүх соёл хийгээд эх орон газар нутгийн үнэ цэнийг харуулсан энэ удаагийн баяр наадмын нээлтийн ажиллагаанд наадамчин олон ам сайтай байгаа юм.

Тэгвэл найруулагч Н.Наранбаатар наадмын нээлтийн талаар сэтгэгдлээ хуваалцахдаа “Төрийн захиргааны уран бүтээлчид, ажилчид, чөлөөт уран бүтээлчид гээд 1500 гаруй хүн энэ удаагийн наадмын нээлтийн ажиллагаанд оролцлоо. Мөн дэлхийд эх орныхоо нэр алдрыг дуурсгаж амжилт гаргасан Монгол Улсын шилдэг уран бүтээлчид оролцлоо. Өнгөрсөн жилийн наадмыг найруулсан. Хүн өөрийгөө ялна гэдэг маш том амжилт. Монголын түүх асар баялаг. Энэ гайхалтай түүхийг баяжуулах ухаан, мэдрэмж, авъяас хэрэгтэй. Энэ жилийн наадмаар ард олныхоо зүрх сэтгэлд хүрч ажиллахыг хичээлээ. Бид юуг хайрлах, юуг эрхэмлэх ёстой гэдгээ анхаарах учиртай. Чингис хааныг дайчин баатарлаг гэхээсээ илүү бидний дэргэд байгаа аав гэдэг хүн Чингис хаан юм гэдэг ухааныг ойлгуулахыг зорьсон. Мөн дэргэдээ байгаа ээжийгээ хайрлаж, эх үрийн холбоог дээдэлж Монгол түмэн маань хайр энэрэлийг ойлгож ухаарах ёстой. Ямар их үнэ хөлс цус хүчээр олдсон газар шороо бидэнд байдгийг ухааруулахыг хүссэн. Хэрэв таалагдсан бол манай багийнхны, манай урлагийнхны хамтын ажил болжээ гэж бодож байна” гэлээ.

Эх сурвалж: www.polit.mn