С.САРУУЛ

Үндэсний их баяр наадмын үндэсний сурын харваа Сурын талбайд үргэлжилж байна. Өнөөдөр үдээс өмнө хана харвааны 20 сумыг харваж дуусгаад байгаа юм. 2017.07.11. 
Энэ жилийн баяр наадмаар сурын харваанд нийт 1100 гаруй харваач оролцож байгаа юм. Сурын харвааны явцын талаар Үндэсний сурын салбар хорооны Нарийн  бичгийн дарга Б.Хүрэлбаатар “Энэ жил үндэсний сурын харваанд 540 харваач оролцож байна. Энэ удаагийн сурын харвааны онцлог нь Үндэсний их баяр наадмын тухай хуулиар эхний гурван байрт шалгарсан харваачид улсын цол хүртэнэ. Хана харвааны 20 сумаа харваж дууслаа. Үдээс хойш хасаа харвааны 20 сумаа тавина. Маргааш өглөө хасаа харвааны дунд өрөг адаг өргийн сум тавигдсанаар энэ жилийн наадмын шилдгүүд тодорно. Энэ жил 300-аад залуу харваач оролцож байна. Эндээс харахад жил ирэх тусам харваачдын тоо нэмэгдэж байна. Аймаг улсын цолтой харваачид ч олон байна. Үндэсний сурын харвааны насанд хүрэгчдэд 18-аас дээш насныхан оролцдог. Хамгийн ахмад нь 80 гаруй настай харваач байна. Энэ жилийн сурын харваанд нийт 1100 хүн оролцож байгаагаас  Урианхай сурын харваанд 180 гаруй, буриад сурын харваанд 160 гаруй харваач оролцсон.
Сүүлийн жилүүдэд харваачдын ур чадвар дээшилж байна. Ер нь оноо нэлээд өндөр гарч ирэх байх. Шилдгийн төлөө олуулаа өрсөлдөх байх. Шинэ хуулиар зургаан хүн улсын цол авах бололцоотой. Төрийн их баяр наадамд түрүүлбэл Монгол Улсын мэргэн цол, хоёрдугаар байрт орсон нь гарамгай мэргэн, гуравдагуур байрт шалгарсан нь гоц харваач цол хүртэнэ. Мэргэн цолтон түрүүлбэл даян мэргэн, даян мэргэн түрүүлбэл даяар дуурсах мэргэн, даяар дуурсах мэргэн түрүүлбэл дархан мэргэн цолтой болно. Нийт харваачдын 30 хувь нь өндөр оноотой байна” гэлээ. 

Эх сурвалж: www.polit.mn