Ц.ОЮУНГЭРЭЛ

Солонгосын сэтгүүлчдийн холбооны төлөөлөгчид Монголд ирлээ.  Тэд өчигдөр /07.07/ Монголын сэтгүүлчдийн төлөөлөлтэй уулзан санал  бодлоо солилцлоо.  Уулзалтад Монголын сэтгүүлчдийн нэгдсэн эвлэлийн ерөнхийлөгч Б.Галаарид, Солонгосын сэтгүүлчдийн холбооны ерөнхийлөгч Жун Куё Сон нарын тэргүүтэй хоёр талын төлөөлөл оролцов. Солонгосын хэвлэл мэдээллийн байгууллагуудаас төлөөлж, 15 сэтгүүлч ирсэн байв.  Б.Галаарид “Солонгосын сэтгүүлчдийн холбоо ерөнхийлөгчөө хоёр жил тутамд сольдог, нэлээд хүчирхэг байгууллага. Тус улсын хэвлэл мэдээллийн байгууллагууд үндэсний аюулгүй байдал, олон нийтийн эрх ашигтай холбоотой асуудалд нэг дуугаар дуугарч чаддаг онцлогтой. Мөн ардчиллын үнэт зарчмын дагуу нийгэм болон төр засгийн бодлогод  нөлөөлж чаддаг хүчирхэг сэтгүүл зүйтэй. Үүнээс бид бүтээлчээр суралцах ёстой гэж бодож байна. Манай хэвлэл мэдээллийн байгууллага бодитой хамтын ажиллагаа тогтооё гэсэн төлөвлөгөөтэй байна. Зөвхөн сэтгүүлчийн хооронд бус редакц хоорондын шууд харилцаа тогтоох боломж байна уу гэдэг санал тавьсан. Энэ удаа Солонгосын талаас өргөн бүрэлдэхүүнтэй төлөөлөл ирж байгаа боломжийг ашиглан бид редакцуудтай харилцаа тогтоох гарц бий болгохийн тулд илүү ажил хэрэгч ярилцлага өрнүүлэх болно” гэж байв.  Монгол, Солонгосын сэтгүүлчдийн хоёр байгууллага 2013 онд анхны харилцан танилцах алхам хийжээ. 2014 оноос тогтвортой хамтран ажиллах болсон байна. Зөвхөн төлөөлөгч солилцоод зогсохгүй хоёр улсад болж байгаа олон улсын хурал зөвөлгөөнд урьж оролцуулах тал дээр ажилладаг ажээ. Энэ нь хоёр улсын ард түмний харилцааг хөгжүүлэхэд  хэвлэл мэдээллийн үүрэг оролцоог нэмэгдүүлэх ач холбогдолтой талаар төлөөлөгчид онцолж байв.  Солонгосын сэтгүүлчдийн холбооны ерөнхийлөгч Жун Кю Сун “Бид өнгөрсөн дөрвөн жилийн хугацаанд харилцан хоёр улсынхаа түүх соёлтой  танилцлаа. Харин энэ удаа бид цаашид хэрхэн хамтарч ажиллах зорилгоо тодорхойлно. Монголын сэтгүүлчдийг Солонгос улсад сургалтад хамруулах чиглэлээр хамтарч ажиллах талаар ярилцсан байгаа. Монгол, Солонгосын сэтгүүлчдийн хооронд ялгаатай гэхээсээ илүү ижилхэн зүйл их байна. Эх орон, ард түмнийхээ төлөө хичээж ажилладаг нь адилхан санагдсан. Мөн ааш зангийн хувьд маш төстэй” гэсэн юм.  Солонгосын сэтгүүлчдийн холбооны төлөөлөл  энэ удаа монголын сэтгүүлчидтэй уулзахын зэрэгцээ Ерөнхийлөгчийн сонгуулийн явцыг ажиглаж, баяр наадам үзээд буцах юм байна.

Эх сурвалж:www.polit.mn