Ч.ЗОТОЛ

Канадын Монреал хотын Конкордийн их сургуульд эс, молекулын шинжлэх ухааны салбарын III дамжааны оюутан Б.Энхжин зуны амралтаараа Монголдоо ирж, Түлэнхийн төв, бүтэн өнчин хүүхдийн асрамжийн төвд туслаад буцлаа. Тэрээр нарийн мэргэжлийн эмч болох сонирхолтой.  Ээж нь Анагаах ухааны их сургууль төгссөн, цэргийн эмнэлэгт мэргэжлээрээ олон жил ажилласан. Өвөө нь  Монгол Улсын гавьяат эмч Н.Баясгалан  нь БХЯ-ны эмнэлгийн албаны дарга,  Цэргийн нэгдсэн төв эмнэлгийн эмчилгээ хариуцсан даргаар ажиллаж байсан. Багаасаа эмч нарын дунд өссөн болохоор эмч болохыг мөрөөддөг байсан хэмээн ярьж байна. Б.Энхжин Монголдоо наймдугаар анги төгсч,  Канадын коллежид элсэн орж амжилттай суралцсанаар их сургуульд орсон. Канадын боловсролын салбар суралцагчдаа багаас нь хүнлэг, энэрэнгүй үзэлд төлөвшүүлж, хүмүүнлэгийн олон ажилд хамруулдаг. Иймд тэрээр  хичээлийнхээ  зав чөлөөгөөр  эмнэлгүүдэд очиж ахмадуудыг асрах, тэднийг кино үзэх, агаарт салхилах зэрэгт  тусладаг. Бусад үед цагийн ажил хийдэг. Энэ зун Монголдоо ирж, цагийн ажил хийж хуримтлуулсан мөнгөөрөө Түлэнхийн төвд тос, уян боолтны  материал,   бүтэн өнчин хүүхдийн “Эрдэм” төвд хүнсний зүйлийг  хандивлажээ.

Эх сурвалж: “Зууны мэдээ” сонин