Б.Оюун-Эрдэнэ

Тулгар төр байгуулагдсаны 2226 жил, Их Монгол улс байгуулагдсаны 811, Ардын хувьсгалын 96 жилийн ой, Үндэсний их баяр наадмын босгон дээр Монгол Улсын Ерөнхийлөгчийн зарлигаар Завхан аймаг Төрийн дээд шагнал “Сүхбаатарын одон”-гоор шагнагдлаа. Бүгд Найрамдах Монгол Ард Улсын Ардын Их Хурлын Тэргүүлэгчдийн зарлигаар 1973 оны 02 дугаар сарын 23-ны өдөр Завхан аймгийг “Хөдөлмөрийн гавьяаны улаан тугийн одон”-гоор шагнаж байсан бол 44 жилийн дараа “Сүхбаатарын одон”-т аймаг болов.

Монгол Улсын тусгаар тогтнолыг бататган бэхжүүлэх, эх орноо батлан хамгаалахад онцгой үүрэг гүйцэтгэж ирснийг өндрөөр үнэлж, үндэсний аюулгүй байдлыг хангах, монгол соёл, уламжлалыг хадгалан хамгаалах, өвлөн хөгжүүлэхэд манлайлж, үйлдвэрлэл, үйлчилгээ, хувийн хэвшил, газар тариалангийн салбарт шинэ санаачилга, амжилт гарган ажиллаж, улс орны нийгэм, эдийн засгийн хөгжилд үнэтэй хувь нэмэр оруулан бүтээлч, эрх чөлөөт нийгэм цогцлоохын төлөө хичээл зүтгэл, хөдөлмөр, бүтээлээ зориулсан, зориулан зүтгэж байгаа үе үеийн ард иргэдийн хичээл зүтгэлд төрийн дээд хүндэтгэл үзүүлж ийнхүү Завхан аймгийг Төрийн дээд шагнал "Сүхбаатарын одон"-гоор шагнасан байна.

Эх сурвалж: www.polit.mn