Ц.БАЯР

“Эрдэнэс-Тавантолгой” компанийн уурхайн амнаас Гашуун сухайт хүртэлх 8.2 км шороон замыг тусгай зориулалтын хүнд даацын автозам болгох нээлтийн ажиллагаа өчигдөр боллоо.  Нээлтэд “ Эрдэнэс-Тавантолгой” ком­панийн тэргүүн дэд захирал Б.Ганхуяг, Дэд бүтэц тээвэр ха­риуц­сан ерөнхий зо­хион байгуулагч Д.Дам­дин­дорж, Цогтцэций сумын Засаг дарга О.Бадарч тээвэрлэлтийн компанийн ажилчин, жолооч нар оролцлоо.

Шороон замаар олон жил нүүрс тээвэрлэснээс болж  байгаль экологид сөрөг нөлөө үзүүлж  Цогтцэций сумын малчид, иргэдийн эрүүл аюулгүй орчинд  амьдрах эрх нь зөрчигдөж байжээ. Мөн нүүрс тээвэрлэлтийн компанид хүндрэл учруулж байсан уг замыг ийнхүү олон жил яригдсаны дараа Монгол Улсын Засгийн  газраас үүрэг болгосны дагуу “Эрдэнэс Тавантолгой”, орон нутгийн өмчит “Тавантолгой” компаниуд хамтран 15 тэрбум төгрөгийн хөрөнгөөр барьж энэ оны IV улиралд багтаан ашиглалтад оруулах болж байна. Одоо ашиглагдаж байгаа Гашуунсухайтын автозам нь нэг тэнхлэгт 23 хүртэлх тонн даацтай, уурхайгаас эхэлж трассын зургаа дахь км-т замтай нүхэн гарцаар огтлолцон найм дахь км-т төмөр замтай гүүрэн гарцаар огтлолцсоноор Гашуунсухайт чиглэлийн автозамтай холбогдох юм. Одоогоор хүнд даацын тээвэрлэлтийн машин шороон замаар цагт 15-20 км хурдтайгаар 15 км замыг 1-2 цагт туулдаг бол энэхүү автозам ашиглалтад орсноор цагт 50 км-ын хурдаар 20 минут туулж  цаг хугацаа хэмнэж, машины эвдрэл гэмтэл,  осол аваар буурахаас гадна тоосжилт бүрэн зогсох ач холбогдолтойг компанийн удирдлагууд хэлж байна. Мөн Засгийн газраас “Таван-толгой”- Гашуунсухайт чиглэлийн авто замтай зэрэгцээ 250 км даацын хатуу хучилттай автозам тавихаар шийдвэрлэсэн. Ингэснээр 8.2 км замтай параллель автозамууд баригдана. Өнөөдрийн байдлаар “Таван-толгой- Гашуунсухайт чиглэлийн 239 км автозамаар өдөрт 1000-1300 хүртэл тээврийн хэрэгсэл нэвтэрдэг. Харин 250 км параллель автозамууд ашиглалтад орсноор тээвэрлэлт 2.5 дахин өсч, нүүрсний экспорт нэмэгдэхээс гадна ажлын байр нэмэгдэх боломжтой гэж “ Эрдэнэс-Тавантолгой” компанийн тэргүүн дэд захирал Б.Ганхуяг онцолж байлаа.

Эх сурвалж: “Зуунымэдээ” сонин